Asri El Brahimek eta Idoia Nogalesek irabazi dute Markina-Xemeingo Karmen Jaietako Krosa
Herriko lehenengoak Lide Azkue eta Oier Kareaga izan dira. Guztira, 89 atletek parte hartu dute aurtengo proban.
Karmen jaietako kroseko korrikalariak Zelaitik irteten. Asri El Brahim gizonezkoetan eta Idoia Nogales Alberdi emakumeetan izan dira nagusi gaur [uztailak 9] arratsaldean Markina-Xemeinen lehiatu den Karmen Jaietako Krosean. 89 korrikalarik parte hartu dute Aringa Aringa Kirol Klubak antolatutako proban.
Zelaitik irtenda Barroeta futbol zelairaino joan dira korrikalariak Xemeindik igarota. Bekobentatik bidegorria hartu eta kiroldegi ondotik udaletxeraino joan berriro Zelaira itzultzeko. Buelta hori bi bider eman dute partaideek helmugaratu aurretik. Lasterketa 18:00etan hasi da, eta 24minutu eta 25 segundoko denbora besterik ez du behar izan El Brahimekek 7,8 kilometroko ibilbidea osatzeko. Nogalesek berriz, 29 minutu eta 49 segundotan amaitu du lasterketa.
Gizonezkoen podiuma: Unai Ibarra, bigarrena, Asri El Brahim garailea eta Ibon Aranguren, hirugarrena.
Lehia bizia egon da gizonezkoen lehen postuetan, Asri El Brahim gaurko garailearen eta bigarren geratu den Unai Ibarra Gallardoren artean. Ibarrak hasi du lasterketa aurreneko postuan, baina amaierarantz aurrea hartu dio Brahimek, eta bata bestearen atzetik ailegatu dira horrela, Zelaiko helmugara. Gizonezkoetan hirugarrena, Ibon Aranguren Kerejeta zestoarra (0:26:04) izan da.
Emakumeetan, berriz, Izaro Aranburu Rementeria aulestiarrak (0:32:15) eta Paule Garcia de Andoin Laka lekeitiarrak (0:33:04) osatu dute podiuma. Guztira, 13 emakumek parte hartu dute gaurko proban.
Emakumeen podiuma: Izaro Aranburu, bigarrena, Idoia Nogales irabazlea eta Paule Garcia de Andoin, hirugarrena.
Herrikoen artean lehenengoak Lide Azkue eta Oier Kareaga izan dira; bigarrenak berriz, Zorion Kareaga eta Nahia Ibarzabal eta hirugarrenak Jon Patxi Aldaolea eta Ane Bringas.
Lasterketa gogorra izan da gaurkoa, korrikalariek beroa jasan dute. HEMEN SAILKAPEN OSOA
