Artez beteko dira Markina-Xemeingo kaleak
Jatorri ezberdinetako artistak bilduko dira Markina-Xemeinen datorren domekan [uztailak 24]. Arteari eta sorkuntza artistikoari bultzada emateko asmoz, II. Margo Lehiaketa Aire Librean antolatu du Markina-Xemeingo Udalak.
Margolarien lana bertatik bertara miresteko aukera egongo da. Izan ere, herriko gune desberdinak margotuko dituzte parte hartzaileek.
09:00etatik 10:00etara eman ahalko dute izena udaletxean. Zigilua eta zenbakia emango zaie materialei, eta fitxa bat bete beharko dute margotzeko txokoa aukeratu eta lanean hasi aurretik. Bi mihise egin ahal izango dituzte, baina bakarra aurkeztu beharko dute lehiaketara.
Artelanen gai nagusia Markina-Xemein izango da: paisaiak, inguruak, herriko txokoak, eraikinak, herritarrak… Eta, horiek irudikatzeko, nahi duten teknika erabili ahal izango dute.
Sariak, kategoria ezberdinetan. Egindako lanak 16:00etatik 17:00etara aurkeztu beharko dira Uhagon kulturgunean, sinadurarik barik, eta erabakia 19:00ak inguruan jakinaraziko du epaimahaiak. Sariei dagokionez, helduen kategorian 800 euroko lehenengo sari bat egongo da, 600 euroko bigarrena eta hirugarren bat 500 eurokoa. Gazteen kategoriako sari bi ere banatuko dituzte, 100 eurokoa 12 urtera arteko gazteen kategorian eta 200 eurokoa 13-17 adin tarteko irabazlearentzako. Herriko lehenengoak ere izango du 150 euroko saria.
Bestalde, aurkeztutako lan guztiekin erakusketa bat egingo da Uhagon kulturgunean, abuztuan eta irailean. Koadroak ikusi eta erosteko aukera egongo da.
