Gizaburuagako frontoi berriaren obrak martxan daude
899.939,77 euroko aurrekontua izan du obra lanak, Gizaburuagako Udalaren azken urteetako obra lan garrantsitzuena.
Gizaburuagako Udalaren eskutik frontoia berritzeko obra lanak hasi zituzten ekainean, eta zortzi hilabete inguru iraungo dutela aurreikusten da. Amaia Zabala Goikoetxea alkateak adierazi duenez: “Azken urteetako obrarik esanguratsuena da”.
Proiektua abiatzeko gogotsu zeuden herritarrak zein udala. Herrian erabilia den frontoian berritasun beharra zuen; mendiaren kontrako hormak hezetasun handiak zituen, eta frontoi estalia zen arren, euria sartzen zen eta horrek luzera arazoak sortzen zituen.
Hori dela eta, udalak frontoiaren proiektua aurrera eraman eta modu egokienean burutzeko asmoz, ideien lehiaketa bat abiatu zuen. Hogeita sei izan ziren lehiaketara aurkeztu ziren proiektuak, eta harrera onaren aurrean epaimahaia osatu zuen udalak. Euskal Herriko Arkitektoen Elkargo Ofizialeko lau ordezkarik parte hartu zuten epaimahaian, Gizaburuagako Udal ordezkariekin batera. Zabalaren esanetan: “Udal ordezkariek bi ardatz hartu zituzten kontuan, batetik herriak behar zuena, eta bestetik, profesionalek emandako iritziak. Horren arabera proiektu egokiena aukeratu zuten”.
Aukeratutako proiektuaren arabera goitik behera aldatuko dute frontoia, eta hobekuntza nabarmenak izango ditu, frontoi estalia izango ez den arren, ondo babestutako frontoia eraikiko dute. Orain arte arazo izan den urari konponbidea emateko asmoz. Gainera, frontoia eta ondoko parkea aparte egon direna, orain bata besteagaz integratuta geratuko dira.
Finantzaketa bidea
Proiektua hautaturik, beharrezko prozedurak martxan jarri zituzten. 899.939,77 euroko aurrekontua zuen proiektuak, eta hortaz finantzaketa proiektuari ekin zioten. Hainbat izan dira lortutako diru laguntzak: 433.000 euroko diru laguntza jaso dute Bizkaiko Foru Aldunditik, 100.000 euro jaso dituzte 2022ko Herriak Eginez programari esker , 45.000 euro azpiegiturak egiteko Foru Aldundiaren laguntzaren bidez, 100.000 euro eskatu dituzte Leader landa garenenen Europako proiektuan, eta gainontzekoa kreditu bidez lortu dute.
