Solorzano: "Ondarroako langileok suminduta gaude"
Arantza Solorzano Ondarroako Artibai egoitzako garbiketaren sektoreko arduradunak sindikatuek sinatutako hitzarmenaren aurreakordioaren aurreko desadostasunak azaldu ditu.
Bizkaiko garbiketaren sektoreak hemezortzi hilabete daramatza lan hitzarmenik gabe, hain zuzen ere, 2020ko abenduaren 31tik. Hitzarmena sinatzeko bidean, lan baldintza duinak lortzeko helburuz hogei negoziazio mahai burutu dira, eta hauetan akordiorik lortu eza bide, azken lau hilabeteetan hamar greba egun burutu dituzte langileek. Ondarroako Eulen enpresako langileek bat egin dute greba egunekaz, eta kalera atera dira egunez egun.
Uztailaren 15an, LAB, CCOO eta UGT sindikatuek aurreakordio bat sinatu zuten negoziazio mahaian, eta Arantza Solorzano Artibai egoitzako arduradunaren esanetan: “Urte eta erdiko borroka egin ostean akordio hori sinatzea lotsagarria iruditzen zaigu”.
Uztailaren 6an egindako negoziazio mahaian patronalak ekarritako eskaintza “lotsagarritzat” jo zuten sindikatuek, eta borrokan jarraitzeko prest agertu ziren, “sinetsi egin genien, eta lagileok gure aldetik prest geunden irailean greba mugagabea egiteko, bidea hasita genuen, eta gu jarraitzeko prest geunden” adierazi du Solorzanok. Baina 15ean burututako negoziazio mahaian, hiru sindikatuk bat egin, eta gehiengoa lortuz, aurreakordioa sinatu zuten langileen sorpresarako: “Ezin genuen sinistu gertatutakoa, akordio hori sinatzeak gure borroka galdutzat ematea dakar, suminduta gaude”.
Bide luzearen amaiera
Solorzanoren esanetan, “sinatutako akordioa ez da hurbildu ere egiten gure eskaeretara, ez dugu 1.000 eurorik irabazten, eta egunean 0,35 euroko igoera ekarriko lukeen akordioa sinatzea, bidegabekeria da”. Egoitzako arduradunak azaldutakoaren arabera akordio “paregabea” bezala saltzen ari diren hori, praktikan, ez da horrela. Adostutakoaren arabera 2021ari dagokion soldata igoera ez da emango, eta 2022ko urtarriletik aurrerako igoera %1ekoa izango litzateke 2024a orduko %13ko igoerara helduz: “%13ko igoera bat sinatu dutela diote, baina datu hori 2024a orduko urtez urte egongo den igoeraren batuketa da, lehen urtean adibidez 190 euroko igoera ekarriko du, urte osoan, hau da, 0,35 zentimo dira eguneko. Benetan uste dute datu horiek lorpenak direla, kontuan izanda bizitza nola ari den igotzen?”.
Ondarroako langileek borrokagaz bat egin zuten hasieratik, eta ondorio guztiak jasateko prest zeuden, “hamar egunez greba egin duten langile ez afiliatuek, eta sindikatu batzuetako afiliatuek bataz beste 400-500 euro galdu dituzte, diru hori sinatutako hitzarmenagaz lau urte barru errekuperatuko lukete”. Hala ere, langileen sumintasuna ez da diru galera, borrokagaz amaitu eta baldintza duinak ez lortzea baizik.
Hala ere, Solorzanok aipatutakoaren arabera une honetan minduta daude, baina indarrak jarri eta ahaleginduko dira beraien baldintzen alde borrokatzen, patronalagaz ez bada, beste bide batzuk aurkituko dituzte.
