Eztanda egin dute Malen jaiek
Gaur [uztailak 21] abiatu dituzte Mutrikuko Malen jaiak, eta uztailaren 25era arte egitarau paregabeaz gozatzeko aukera izango dute bertaratzen direnek.
Txupina botatzeagaz batera abiatu dira 2022ko Malen Jaiak. Herriaren kolore biziek agerian usten dute jai gosez daudela mutrikuarrak. Erraldoi eta buruhandiak atera dira Goiko Plazan eta herriko txikienen ilusioak astindu dituzte, hamaika izan dira erraldoiengana hurbildu direnak, gona azpian sartu direnak, eta bateren bat izutu ere egin da. Buruhandiek berriz gazteen bizitasunagaz atera dira eta korrikan jarri dituzte herriko nerabeak.
Goiko plaza gainezka egonda, kalez kale kalejira abiatu da txistularien laguntzagaz. Giro aparta sortu da herriko kaleetan eta Beheko plazara heltzean, herritar guztiak bildu dira. Jaiak hasi dira, giroa paregabea da, eta dena prest dago datozen egunetan gozatzen jarraitzeko.
Jaiei hasiera behar bezala emanda, arratsaldeagaz aurrera egin eta Larrain dantza herrikoiagaz gozatzeko aukera dute, Gure Ametsa herriko dantza taldearen eskutik. Ondoren, Bizixo Jai Konpartsak antolatutako elkartasun kalejira abiatuko da Goiko plazatik eta txosnagunean bukatuko da.
Gaurik bereziena. Malen Jaien unerik bereziena eta herritarren barrenak mugitzen dituen ekimenari bide emango diote gaueko 23:00etan, hain zuzen ere, danborradaren unea heltzean. Aurten, antolatzailea den Mandazketa elkartearen 50.urteurrena ere ospatzeko eguna izanik, are bereziago bilakatuko da mutrikuarren gaua. Danbor hotsak entzunagaz, herria gelditu egingo da, ikusleen ahotsak bat eginez herriaren ikur den abestia ozen abestuko dute.
Ondoren, emozioak pil-pilean dituztela, gauagaz jarraitzeko asmoz daudenek Oihan Vegagaz geratu ahalko dira Goiko plaza girotzen.Gaua gaztea izanik, gauerdia emanaz batera, beste hainbat ekimen jarriko dira martxan Jai Batzordearen eskutik, hain zuzen ere, txupinazoa eta Bizixotxon igoera burutuko dute txosnagunean, Batukada Feministak girotua. Ondoren, Casus Beli eta DJ Koi4k egongo dira gaztetxean.
Gazte Eguna, gazi-gozo
Jaiak hasi baino lehenagoko egunetan herrian izandako gertakarien harira, Jai Konpartsak bertan behera utzi ditu Gazte Eguneko brindisa, poteoa, bazkaria eta karropoteoa. Bizixo Jai Batzordeak plazaratu duenez, «egitaraua aurrea eramaten den espazioak seguruak izatea nahi dugu. Beraz, argi esan gendun bertan inolako erasotzaileik eztala onartuko. Erasotzaile matxista, arrazista, homofobuak eta transfoboak ez diren onartzen bezala, sistematikoki errepresioa aplikatzeko funtzioa dakat heinean, polizia ere ez».
Gaineratu dutenez, «erabakia ez da hartu pertsona konkretu baten arabera, eta ez dauka helburutzat bazterketa soziala. Erabaki hau poliziak daukan funtzioa salatzeko eta horren normalizazioa ekiditzeko hartu da». Erabakiak herrian sortutako ohiartzuna medio erabaki dute Gazte Eguneko ekimen batzuk bertan behera ustea.
Gertaerengatik herrian sortutako giroaren aurrean, Mutrikuko Udalak adierazpenak kaleratzeko beharra ikusi eta EH Bildu, EAJ eta B+I alderdiek sinatutako idatzia argitaratu du. Adierazpenak lau puntu nagusi nabarmentzen ditu.
Mutrikuko Udalak adierazi du jaien antolakuntzari ekiten dionean herritar guztientzako jaiak antolatzen dituela, «herriko kale eta espazio guztiak herritar guztien gozamenerako moldatuta». Antolakuntzari erreparatuta, udalak eta Jai Konpartsak elkarrekin lan egiten dutela adierazi dute, baina argitu dute Jai Konpartsak «autonomiaz» jokatzen duela txosnaguneko ekitaldietarako.
Gainera, esan dute udalak jaietan ere inolako berezikeriarik gabeko espazioak eta herritar guztientzako eremu seguruak bermatu nahi dituela eta ez duela onartzen espazio horretan inor baztertzea. Azkenik, antolatutako ekitaldietan «herritar nahi bisitari guztiek elkarrenganako errespetuan» parte hartu dezatela bermatu nahi dutela adierazi dute. «Udalak ez du ontzat emango arraza, jatorri, hizkuntza, genero, sexu eta beste edozein modutako beldurrarazterik, jazarpenik nahiz bereizkeriarik, ezta lanbide bat edo beste izateagatik ere». Gertatutakorekin ezadostasuna agertu, eta babes osoa eskaini diote «berezikeria» jasan duen herritarrari.
