Lekeitioko Pietatearen baselizako irudiak zaharberritzen ari dira
Udal artxiboko dokumetuen arabera, Pietatearen baselizako erretaula XIX. mendeko bigarren hereneko altzari neoklasikoa da, hala ere, titularraren irudia askoz zaharragoa da.
Joan den astean, Pietatearen Kristo Santuaren baselizako Kristoa eta beste irudi batzuk zaharberritzeko eraman zituzten. Iñaki Madaraiaga Valle historiazale lekeitiarrak jakitera eman duenez, Aurea ondare historikoa berreskuratzen duen enpresak eraman ditu bere tailerrera, eta baselizako erretaula ere berreskuratzen hasi dira. Berreskuratze enpresak dionez, mazoneria eta hiru irudi zaharrenak estaltzen dituzten pinturak kentzen ari dira, hau da, Kristo harri hotzaren gainean deituriko irudiarena eta San Anton eta Santa Agedarenak.
‘Kristo harri hotzaren gainean’ irudia. Argazkia: Iñaki Madariaga Valle
Lekeitioko Udal Artxiboko dokumentuen arabera, Pietatearen baselizako erretaula XIX. mendeko bigarren hereneko altzari neoklasikoa da. Hala ere, titularraren irudia askoz zaharragoa da: “Irudi horrek salbatzailea erakusten du, harkaitz baten gainean, oin eta eskuak lotuta dituela. Min eta babesgabetasun espresioa dauka, eta zain dago ea noiz gurutziltzatuko duten. Flandeseko eredu jakin bati jarraitzen dio, Kristo harri hotzaren gainean deiturikoari. XVI. mendearen lehen hamarkadan, gure lurraldean, nolabaiteko hedapena izan zuen, bestak beste, Bilbon, Plentzian edo Ondarroan”.
