Goikoetxea eta Aimar, Lekeition jaun eta jabe
Iñaki Osa Goikoetxeak eta Aimar Aldabazalek irabazi dute Lekeitioko Hiria Txapelketa. Aritz Erkiaga eta Jon Zabala menperatu dituzte finalean. Gazte mailan, Eñautek eta Manzisidorrek Goitiaren eta Atainen kontrako partidua irabazi dute.
Argazkia: Jai Alive Iñaki Osa Goikoetxea beterano zumaiarrak eta Aimar Aldazabal berriatuarrak Lekeitioko Hiria Txapelketa poltsikoratu zuten zapatuan, finalean Aritz Erkiaga ispastertarra eta Jon Bullet Zabala markina-xemeindarra menpean hartu ondoren. Final estu-estua izan zen Lekeitioko Santi Brouard pilotalekuan jokatu zutena. Berdintasuna agerikoa izan zen bai emaitzetan, bai jokaturiko partiduen bilakaeran.
Finaleko lehendabiziko setean Erkiagaren erakustaldia ikusi zuten bertaratu ziren guztiek: ikusleak zutundu zituen Ispasterkoak eta mota denetako tantoak egin zituen. Maila handi horri esker, lehenengo seta 15-11 irabaztea lortu zuten Lea-Artibaiko puntistek. Bigarren setean, baina, beren mailak behera egin zuen nabarmen, eta ahulezia hori probestu zuten, hain zuzen ere, Goikoetxeak eta Aimarrek. Goikok tanto ederrak bukatu zituen, dotoreziaz, eta seta 11-15 poltsikoratu zuten.
Hirugarren eta azken setean, berdinketa haustean, lehia handia egon zen bi bikoteek artean, finala zeinek eskuratuko erabakitze aldera. Ikusleek ere berotasunez erantzun zioten pilotarien ekinari. Set horren amaieran, Goikoetxeak eta Aimarrek garaipena lortu zuten 3-5eko markagailuagaz, eta, horrenbestez, Lekeitioko Hiria Txapelketako irabazle izendatu ziren.
Final handiaren aurretik, frontoira hurreratutakoek gazte mailako partiduaz gozatzeko aukera paregabea ere eduki zuten. Lehenengo norgehiagoka horretan, Eñautek eta Manzisidorrek osaturiko bikotea Goitiak eta Atainek osatutakoaren kontra lehiatu ziren. Lehenengo partidu hori ere zeharo berdindua izan zen, eta Eñautek eta Manzik irabazi zuten azkenean; lehiakortasunak markagailuko berdintasuna ekarri zuen, 30-28 amaitu baitzen finala. Abiadura eta maila handiko partidua izan zen finaleko jardunaldia zabaldu zuen hura, eta ikusleek begi oso onez hartu zituzten pilotarien ekina, jarrera eta jokoa.
