Goikoetxea eta Zabala, Hondarribiko finalaurrekora
Iñaki Osa Goikoetxeak eta Jon Zabalak Hondarribiko Grand Slamean irabazi diete Johan Sorozabal eta Jokin Del Riori. Txapelketako finalaurrekora pasatu dira garaipenagaz. Gazte mailan, Etxeberri eta Manzisidor gailendu zaizkie Basterra eta Zugaitzi.
Argazkia: Jai Alive. Iñaki Osa Goikoetxea zumaiarrak eta Jon Bullet Zabala markina-xemeindarrak Hondarribiko Grand Slameko finalaurrekora sailkatzea lortu zuten joan den barikuan, Jostaldi pilotalekuan jokaturiko final laurdeneko partidua irabazi ondoren. Goiko eta Zabala Johan Sorozabal lapurtarraren eta Jokin Del Rio gasteiztarraren aurka aritu ziren, eta beraien nagusitasuna erakutsi zuten ia laurehun ikusleren aurrean.
Goikoetxea eta Zabala hautagai nagusiak ziren garaipena poltsikoratzeko; izan ere, Sorozabal eta Del Rio azken orduko ordezkapen modura kantxaratu ziren, Goiko eta Bulleten aurkariak, berez, Jean Dominique Olharan eta Nicolas Etxeto baitziren. Dena dela, Sorozabalen eta Del Riok aurpegia eman zioten partiduari, eta haginak erakutsi zizkieten hautagaiei. Horren erakusle da, hain zuzen ere, hirugarren seta, berdinketa haustea, jokatu izana.
Argazkia: Jai Alive.
Lehendabiziko setean Sorozabal gaztea maila handian agertu zen, bikote urdina 2-3 aurreratuz. Ondoren, Del Riok ondo eutsi zien gorrien erasoaldiaei, markagailuan bizirik mantenduz: 9-7. Une hartan, baina, Goikoetxeak eta Zabalak erritmo puntu bat gehiago ipini zioten partiduari, eta 15-8 gailendu ziren lehenengo setean.
Bigarren seta are parekatuagoa izan zen, eta markagailuak denetariko alternatibak erakutsi zituen: 1-0, 1-3, 7-5, 8-9… Sorozabalek eta Del Riok beraien aukerak errealak zirela sinistu zuten, eta seta 12-15 irabazi zuten, batez ere, Miarritzeko aurrelari gaztearen joko bikainari esker. Berdinketa haustean, Goikoetxeak eta Zabalak lanak izan zituzten partidua eskuratzeko, eta markagailua urduritasunaren erakusle izan zen: 0-1, 2-1, 2-2 eta 5-2.
Argazkia: Jai Alive.
Jaialdia, gainera, gazteen partiduagaz ipini zen abian. Iban Etxeberrik eta Mikel Manzisidorrek 22-25 irabazi zieten Julen Basterra eta Zugaitzi. Aste honetatik aurrera, Grand Slameko partiduak zapatuz jokatuko dira, 18:00etatik aurrera. Zapatu honetan, Aritz Erkiaga ispastertarrak eta Eric Irastorza puntista beteranoak Jokin Arbe markina-xemeindarra eta Lekue izango dituzte arerio. Txapelketako final handia urriaren 8an izango da.
