Mutrikuk KAE 2 ligan jarraituko du
Mutrikuarrek ez dute lortu KAE 1 mailara igotzeko txartelik. Busturialdea Eusko Label ligako play offetan gertatzen denaren menpe dago maila mantentzeko.
Iturria: Bermeo Arraun Argazkiak Asteburuan lehiatu dira KAE ligako play offeko estropadak, eta Mutriku eta Busturialdea taldeek ez dute esperotako emaitzak lortu. Denboraldi ederra egin eta mailako hirugarren sailkatuak izan ostean, play offak lehiatzeko aukera izan dute mutrikuarrek, baina ez dute lortu txartela mailaz igotzeko.
Zapatuan [abuztuak 27] , kantauriar uretan lehiatu zen lehenengo estropada, Colindresen, hain zuzen ere. 17:30ak emanaz batera, Mutriku, Busturialdea, Donostiarra eta Camargo Cueva el Pendo taldeak prest zeuden lehia abiatzeko. Lehenengo unetik donostiarrek nagusitasuna erakutsi zuten, ziabogara sartzen lehenak izanik, baina Camargo taldea ez zen atzean geratu, segundo eskas bateko aldeagaz lehia bizian aritu ziren. Hamar segundoko aldeagaz sartu ziren, berriz, Mutriku eta Busturialdea. Azkenik, estropada osoan indarrak mantenduz Donostiarra izan zen lehena sailkatzen, 20 minutu 53 segundo eta 81 ehuneneko denboragaz. Camargo 9 segundora ailegatu zen. Busturialdekoak izan ziren hirugarrenak, 21 minutu 13 segundo eta 53 ehuneneko osatuaz, segundo batera, berriz Mutrikuarrak helmugaratu ziren.
Iturria: Bermeo Arraun Argazkiak
Lehenengo estropada burututa eta hamazazpi segundoko aldeagaz lehen sailkatutik azkenengora, baina oraindik txartela erabaki gabe zegoen. Domekan [abuztuak 28], bigarren aukera bat zuten Erandion. Sendo atera ziren lau taldeak, Busturialdeak bigarren postua eskuratu zuen hasieratik, eta Mutrikuarrek ere indartsu abiatu zuten estropada. Lehenengo ziabogara Busturialdea eta Donostiarra batera heldu ziren, bi segundora mutrikuarrak helduaz. Lehia bizi bizirik zegoen, baina bigarren ziaboga orduko donostiarrak nagusitasuna erakutsiz estropadaren buru ziren jada. 20:48:,48ko denboragaz, merezitako garaipena eskuratu eta KAE1 ligara igotzeko txartela eskuratu zuten gipuzkoarrek.
Donostiarra taldearen atzetik Camargo izan zen bigarrena helmugaratzen, Busturialdea eta Mutriku taldeek jarraitu zioten. Hortaz, sailkapenak eskuan izanik, datorren denboraldian Mutriku taldeak KAE2 ligan lehiatzen jarraituko du.
Busturialdeari dagokionez, playoffetako emaitzak eskuan izanik KAE2 mailan lehiatuko luke datorren denboraldian, baina oraindik itxaropenari eutsi ahal diote. Elkartetik jakinarazi digutenez “zapatuan estropada eskasa egin genuen, baina igandean ondo lehiatu genuen, lehenengo luzea ondo joan zen, bigarrena ere, baina gero beherantz egin genuen. Aurkariak hobeak izan ziren”. Hortaz, hirugarren postua eskuan izanda, itxarotea besterik ez du busturialdeko taldeak, Eusko Label ligako playoffetan zer gertatuko zain geratuko dira: “Azken hilabetean estropada onak egin ditugu, baina ez dugu lortu mailari eustea, orain itxarotea besterik ez dugu, Eusko Label ligako playoffetan gertatzen denaren araberakoa izango da gure etorkizuna, eta datorrena hartuko dugu”.
