Markina-Xemeingo Atxondo kiroldegia irailaren 5ean zabalduko da
Irailaren 1ean aurreikusita bazegoen ere, material faltagatik irekiera atzeratu behar izan du udalak
Argazkia: Markina-Xemeingo Udala Markina-Xemeingo Atxondo kiroldegia itxita egon da uda osoan eta hasiera batean irekiera eguenean [irailak 1] aurreikusita bazegoen ere , azkenean ez dute irailaren 5era arte zabalduko. Udalak jakinarazi duenez ezin izan dituzte lan guztiak denboran amaitu: “ahalegin handia egin da kiroldegiko instalazio berrituak aurreikusitako datarako prest egon daitezen. Izan ere, bizi dugun egoera dela eta, beharrezko materiala epe jakin baten barruan lortzeko zailtasun handiak izan dira. Horri gehitu behar zaio lanak udan burutu direla”.
Horrez gain, udan eta oraindik gaur egun bizitako ur eskasiari aurre egiteko, eta Ur Partzuergoak helarazitako neurriak jarraituz ezin izan dute igerilekua guztiz bete. Ur txorroen eremua izan da, hain zuzen ere, udan zabalik egon den gune bakarrenetarikoa eta irailaren 5ean itxiko dute eremu hori,bertan lanak aurrera eraman ahal izateko.
Atxondo kiroldegiko eraikuntza hobetzeko lanek oraindik jarraitu egingo dute. “Instalazioak erabilgarri egongo diren arren, lanengatik eragozpenak sortu ahal dira”, ohartu dute udaletik. Instalazio guztiak erabili ahalko dira, futbito kantxa izan ezik pare bat astetan, “eremu honen parte bat behar delako obrako materiala gordetzeko”. Gainera, kiroldegi ondoko aparkalekua oraindik ez da erabilgarri egongo.
