Miguel Arrieta Lekitto musika bandako eta Estudiantinako zuzendari ohia hil da 83 urtegaz
Mutrikuarra 35 urtetan egon zen karguan musika bandan, inor baino gehiago.
Miguel Arrietak 1962an hartu zuen lehen aldiz Lekitto musika bandaren zuzendari kargua Francisco Garcia ordezkatuz. Bi izan ziren musikariaren lehen garaiko ezaugarririk nabarmenenak, bandaren arabera: “batetik, musika ikastera hurbiltzen ziren ikasleei ematen zien tratu duina, eskoletan ematen zen tratu ankerraren aldean, guztiz bestelakoa. Bestetik, garai hartan, herriko plaza jendez bete egiten zela bandaren bailableekin dantzan egitera”.
1967an Rafael Rosellek hartu zuen bere postua, bost urteko lehen aldi hori itxiz. 1975ean itzuli zen Arrieta Lekitto musika bandaren zuzendari kargura, 30 urte luzetan egon zen, 2005era arte, gaur egun zuzendari den Urtzi Iriondori testigua pasa zion arte. “Euskal musikagintza suspertzeko xedez, euskal kantautoreen abestiak eta abesti herrikoiak bandarako moldatzen lan handia egin zuen, baita kanta berriak asmatzen ere. Bailableak eta kontzertuak uztartu zituen Musika Bandak garai hartan”.
Miguel Arrieta, Lekeitioko portuan.
Iriondok Mutrikutik ezagutzen zuen Arrieta, ez bakarrik Miguel baita bere familia ere: “Etxeko modukoa zen niretzat, Pako Arrieta aitagaz hasi nintzen musikan eta Agustin anaia izan zen nire lehen zuzendaria”. Lekitto musika bandako egungo zuzendariak San Antolin jaien “data bereziak” nabarmendu ditu, “herriko musikako erreferente nagusi eta bakarra izan da urte askoan eta aktibo egon da azken egunera arte”.
Sortzaile. 1964. urtean bandurria jole moduan hasi zen Estudiantinan. Garai hartan, Andres Ordorika zen taldearen burua, eta saioen prestatzailea, berriz, Markos Santamaria. Zenbait urtera, Miguel Arrietak hartu zuen Estudiantinaren gidaritza, berau sendotu eta berregituratuz. Ordutik, hainbat abesti eta melodia berri sortu zituen, eta gaur egun estudiantinak jotzen duen errepertorioa berak armonizatutakoa da.
Hauek dira kanta ezagunenetako batzuk: Arranegi, Gabota 2, Otoio, Gabota 4, Paparduak, Biribilketa, Eskolape, Kaltzapintxo, Aittitta Makurra, Karraspio, Zumatzeta, Sugelandaria, Maite, Hamalau Kirriskarro, Talatik Portaleraino, Lekitto bai polita, Kukua, Trabola, Kanal de Mantxatik, Otzaratxu bat. 2010. urtean Lekitton kantaten I. liburuan bildu ziren abesti horietako asko.
