Naia Arantzamendi ondarrutarraren film laburra estreinatuko dute Donostian
Donostiaren historiako gertaera lazgarrienetarikoa izan zen setioa oinarri hartuta, istorio unibertsal bat sortu du Arantzamendik, kontakizun ofizial horretan ezabatuak izan diren ahotsei garrantzia emanez.
Donostiako San Jeronimo aretoan proiektatuko dute gaur [abuztuak 31] Naia Arantzamendi kazetari, gidoilari eta zuzendari ondarrutarraren Sutan izeneko film laburra. Arantzamendik Zinea hedabideak antolatutako 2020ko I. Gidoi Lehiaketa irabazi zuen, eta film bihurtu du. Azaldu duenez, diru sariagaz gainera, gidoiaren filmaketarako finantzaketa zein giza baliabideak bilatzeko aukera eskaintzeko konpromisoa hartu zuen Zinea hedabideak, eta Maluta Films ekoiztetxe donostiarra izan dute bidelagun ekoizpena egiterako orduan.
Naia Arantzamendi ‘Sutan’ film laburra filmatzen. Argazkia: Maluta films
Sutanek 1813an Donostiak jasandako erasoa kontatzen du, gau horretan ume bati gertatu zitzaion testigantzatik abiatuta. «79 lekukotza jaso ziren gertaera hori eta gero, eta denek kontatzen zuten gutxi gorabehera, jazoeraren alderik txarrena emakumeek eraman zutela, baina testigantza horietatik guztietatik bi ziren bakarrik emakumeenak». Beraz, fikziozko testigantza bat sortu du zuzendariak, «kontatu ez den testigantza bat», gertatu zena islatzeko.
Naroa Miguel Arregi umeak bete du Juana protagonistaren papera eta Joseba Usabiagak eta Iker Galartzak antzeztu dituzte gerrariak. «Umea aurkitzeko kasting bat egin genuen. Garrantzitsuena niretzat umea zen, denbora guztian agertzen da oso plano motzetan, eta garrantzitsua zen bere lana. Kastingean 100 ume edo ikusiko genituen eta zoramen bat izan zen, baina Naroa ikusi nuenean bera zela jakin nuen. Kamara aurrean zeukan lasaitasuna zeukan adinagaz ez zen ohikoa. Beretzako egoera zaila zen, imajinatu egin behar zuen gerra bat, eta oso ondo egin zuen dena».
Naroa Miguel Arregi, ‘Sutan’ film laburreko protagonista. Argazkia: Maluta films
Asteburu bakarrean. Errodaje lanak asteburu bakarrean burutu zituzten otsailean, Andoaingo hainbat txokotan, eta eskarmentuzko lantaldea izan duela ondoan azpimarratu du ondarrutarrak. «Zuzendu dudan lehen filma izan da, eta esperientzia handiko jendea izan dut ondoan; alde horretatik oso babestuta sentitu naiz».
Maluta Films ekoiztetxeko Ritxi Lizartza izan da ekoizlea, Cris Fraile errodajeko produkzio burua eta Alex Sueriasek, Victor Rodriguezek, Iban Toledok, Javier Sevak eta Ioritz Dominguezek osatu dute argazki taldea. Arantzamendiren gidaritzapean aritu da Ainara Mendiola zuzendari laguntzaile lanetan, Lander Llorens arduratu da soinuaz, Maialen Sarasua Oliden script eta muntaketa lanekin, Telmo Tola izan da figuringile eta Nerea Berroeta zein Sandra Vicente aritu dira arte zuzendari.
Esperientzia aberasgarria izan dela gaineratu du Arantzamendik, batez ere grabazioko egunak. «Lantaldeagaz harremana, eta batez ere umea zuzendu beharra berezia izan da. Errespetu handia nion, baina oso ondo joan da; pozik geratu naiz beragaz eduki dudan harremanagaz».
Testuinguru aproposa aukeratu dute filmaren estreinaldirako. «Egun horri lotutako egitaraua antolatzen dute Donostian eta horren baitan estreinatzea nahi genuen». Naroa Miguel aktoreagaz batera egingo du aurkezpena, eta emakumea eta gerra hizpide, mahai-ingurua egongo da ondoren.
Filmaren zabalkundeari dagokionez, Sutan beste jaialdi batzuetan ezagutzera emateko izena emanda dagoela ere aurreratu du zuzendari ondarrutarrak, eta bere herrian ematea gustatuko litzaiokela aitortu du.
