Julen Gabirondo, Etxebarrian jaun eta jabe
Julen Gabirondo nagusitu da Etxebarrian lehiaturiko Euskadiko 3. mailako aizkolari txapelketako kanporaketan. Frontoia ikuslez bete da, eta giro ederra izan da nagusi. Mikel Agirre ondarrutarrak 18. postuan amaitu du proba.
Argazkia: Etxebarriako Udala. Etxebarriak Euskadiko 3. mailako aizkolari txapelketako kanporaketa jardunaldia hartu zuen domekan [irailak 4], 12:00etan hasita. Euskal Herri osoko aizkolariak herriko pilotalekuan elkartu ziren, hurrengo kanporaketarako igaroko ziren aizkolariak zeintzuk izango ziren zehazteko. Horrenbestez, maila handia izan zen frontoian, eta goi mailako ikuskizuna eskaini zuten. Kanporaketa horretan Lea-Artibaiko parte hartzaile bakarra lehiatu zen: Mikel Agirre ondarrutarra. Agirrek 18. postuan amaitu zuen proba eta, ondorioz, ez zuen lortu hurrengo faserako sailkatzea.
Pilotalekua jendez lepo agertu zen. Etxebarriko alkate Jesus Iriondok azaldu duenaren arabera, etxebarriatarrek eta kanpotik bertaratutakoek “oso ondo” erantzun zuten, eta “giro bikaina” izan zen nagusi. Herritarrek doako sarrera eduki zuten, eta kanpokoentzako 300 sarrera ipini zituzten eskuragarri. Ikusleek parte hartzaile guztiak babestu zituzten, eta aizkolaritza goiz ederra bizi izan zuten.
Argazkia: Etxebarriako Udala.
35 parte hartzailek eman zuten izena aurretiaz, baina 30 agertu ziren probaren egunean. Iriondok argitu duenez, eguneko egur loteak “gogor samarrak” izan ziren, eta, hortaz, aizkolariek lanak izan zituzten egurra ebakitzeko. Garailea Julen Gabirondo izan zen, 12.39ko denboragaz; bigarren postuan Andoni Iruretagoiena Izeta VI.a sailkatu zen, 13.04koagaz; hautagai nagusia, Iker Vicente, hirugarrena izan zen, sesioa 14.11n burututa. Vicenteri “lote gaitza” egokitu zitzaiola adierazi du Iriondok: “Egur gogorra suertatu zitzaion zozketan, eta horrek asko baldintzatu zuen bere emaitza”.
Lehen 13 sailkatuek 2. mailako txapelketako kanporaketarako txartela eskuratu zuten; kanporaketa hori urrian izango da, Larrabetzun. Bertan lehen lau postuetan sailkatzen direnak, era berean, 1. mailakoa lehiatzera pasatuko dira. Bestalde, omenaldirako tartea ere egon zen domekan: Etxebarrian aizkolaritzaren sustatzaile nagusia den Luis Mari Bengoa omendu zuten, eta txapela ere jantzi zioten.
Argazkia: Etxebarriko Udala.
