Arrillaga, Astigarraga, Elorza eta Larrañaga, nagusi Arretxinagako Txara Trail lasterketan
Kirola izan zen ekimen nagusietako bat Sanmigel jaien azken egunean. I. Txara Trail mendi-lasterketak eta martxak eta Beteranoen futbol partidak jokatu ziren atzo [urriak 2] goizean.
Kirol jarduerekin borobildu zituzten atzo [urriak 2] Arretxinagako Jaiak, giro paregabea egin zuen, eta erantzun ezin hobea izan zuten ekimenek herritarren aldetik.
Goizean goizetik Aringa Aringa Mx taldeak antolatutako I. Arretxinagako Txara Martxa eta I. Txara Trail Mendi lasterketa burutu ziren. Mendi lasterketako ibilbide motza burutu zutenen artean, Leticia Ainhoa Arrillaga Ezquerro nagusitu zen, 01.18.48ko denboran osatuaz 11,7 kilometroko ibilbidea. Malen Goitiz Irunguenpagate eta Nahia Ibarzabal Gisasola herritarrak osatu zuten podiuma. Gizonezkoetan, berriz, Xabi Astigarraga Pagoaga nagusitu zen 01.01.56 denbora osatuaz, eta Jon Maiztegi Pagaldai markina-xemeindarrak eta Igor Urionabarrenetxea Zaldunbidek osatu zuten podiuma.
Lasterketa luzean, berriz, Oier Elorza Abaunzek 01.45.50eko denboran osatu zuen 18,5 kilometroko ibilbidea, lehenengo postua eskuratuz, eta Jon Alberdi Etxabe eta Gaizka Ansola Garitagoitia markina-xemeindarrak osatu zuten podiuma. Emakumezkoetan, 02.10.13 denbora osatuaz Irati Larrañaga Matxain nagusitu zen. Larraitz Aragon Iruskieta eta Ainhoa Zelaia Agirrezabalek osatuaz podiuma.
“Poz-pozik gaude lasterketaren eta mendi-martxaren emaitzagaz, lehenengoa izateko benetan ondo joan da dena, eta oso goiz polita pasa dugu”, esan dute antolatzaileek. Gainera, korrikalarien aldetik izandako erantzun ona ikusita, datorren urtera begira daude honez gero.
Artibai, Berriatua eta Galdakaoko beteranoak Barroetan.
11:00etan, berriz, Artibai, Berriatua eta Galdakaoren arteko beteranoen triangeluarra jokatu zen Barroetako futbol-zelaian. Zelairatzen lehenengoak Galdakao eta Berriatua izan ziren, eta eskualdeko taldea izan zen zen nagusi Galdakaori 2 eta 1 irabazita. Markina-Xemeingo taldea neurtu zen jarraian Galdakaorekin, eta herrikoak izan ziren garaileak 1 eta 0 irabazita. Azken partida, beraz, Artibai eta Berriatuaren artean jokatu zuten. Berdinduta ibili ziren taldeak eta ez zuen inork aurkariaren atean baloirik sartzea lortu. Horrela, 0-0ko berdinketa penaltietan erabaki zuten, eta horretan Artibaikoek punteria hobea eduki zuten Arretxinagako kopa irabaziz.
Amtes eta Dani Askaiturrieta Tortilla Txapelketako irabazleak, Arretxinagako Jai Batzordeko kideekin.
Musika eta tortillak. Kirol jarduerez gainera, XII. Tortilla Txapelketa ere lehiatu zen Arretxinagaz. Guztira 27 tortilla aurkeztu ziren txapelketara, baina horietatik bi kanpoan utzi zituzten epaimahaikoek, osagaien artean piperrak gaineratu zituztelako. Beraz, azkenean 25 tortillen artean egon zen erabakia, eta horietatik hoberena Dani eta Amets Azkaiturrieta aita-semeak egindakoa izan zela ebatzi zuten.
Eguerdiko giroa Txamukos mariatxien doinuekin alaituta egon zen. Entzuleak ere kantuan jarri zituen taldeak, abesti ezagunak abestera gonbidatuta. Musika izan zen jaiak amaitutzat emateko arduraduna ere. Amak taldearen kantaldiagaz gozatu zuten entzuleek arratsaldean.
