Gudari baten gorpuzkiak errekuperatu dituzte Mutrikun
Atzo [urriak 2] Gerra Zibilean hildako gudari baten deshobiratzea burutu zuten Aranzadi Zientzia Elkartekoek. Bustiñaga baserriko Kontxi Urkiriren testigantzari esker berreskuratu ahal izan dira gorpuzkiak.
Iturria: Mutrikuko Udala Eusko Jaurlaritzak eta Aranzadi Zientzia Elkarteak elkarlanean egindako lanari esker, Gerra Zibilean hildako gudari baten gorpuzkiak errekuperatu zituzten atzo, lursailaren jabearen testigantzatik abiatuz.
Eusko Jaurlaritzako Giza Eskubideen, Bizikidetzaren eta Lankidetzaren idazkaria Jose Antonio Rodriguez Sanz, Gogora memoriaren, bizikidetzaren eta giza eskubideen institutuko zuzendari Aintzane Ezenarro eta Mutrikuko alkate Joseba Palenzuela bildu ziren atzo, gudariaren gorpuzkien deshobiratzean. Hurbildutako guztiek aipatu zuten memoria historikoaren balioa, eta hedapena eta sentsibilizazioaren beharra.
Testigantza. Bustiñaga baserriko Kontxi Urkirik Ahotsak proiektuaren baitan, Intxorta Kultur Elkarteari eta Saturraran Elkarteari emandako testigantza bati esker berreskuratu ahal izan dira gorpuzkiak. Urkirik bazekien aitaren osaba batek, inguruko beste baserri bateko bizilagun batekin batera, Bizkaia aldera erretiratzen ari zirela tiroz hil zuten gudari baten gorpua lurperatu zutela. Lekukotzaren arabera, ehorzketa lekua harri batzuekin estali eta seinaleztatu zen. Gaur egun arte mantendu da.
Memoria historikoa berreskuratzeko bidean aurrera pauso bat izan den aurkikuntza, Aranzadi Zientzia Elkarteko Lourdes Herrastiren agindupean burutu da. Ikerketari esker hainbat hezur errekuperatu dituzte, baina, gaur gaurkoz, ez dago identifikatzeko burutzeko inolako zantzurik. Hala ere, aipatu dutenez, 1936ko irailean kokatzen dute heriotza, Debabarrenean matxinatutako tropen aurrerapenarekin batera.
