Ikasturteko programazioa aurkeztu du Etxelilak
Ikastaroetan izena emateko epea bihar [urriak 4] hasiko da. Lehenengo ekimena Aringaingan taldearen aurkezpena izango da, eguenean [urriak 6] 19:00etan, Etxelilan.
Ondarroako Etxelila Emakumeen Topaguneak 2022-2023 ikasturteko programazioa aurkeztu du. Ohi legez, aurten ere lau izango dira oinarri nagusiak: jabekuntza eskola, eztabaidagune feminista, parte hartze gune irekiak eta erakusketak.
Eztabaidagune feministaren helburua herritar guztiei zuzendutako jarduerak antolatzea da, aditu batek gidatuta, hausnarketa eta eztabaida feministak garatzeko espazio bat irekiz. Lehenengo ekitaldia, Indarkeriak dantzatzera behartzen gaituzte. Gatazka armatuaren irakurketa feministak liburu aurkezpena eta solasaldia izango dira, eta urriaren 11an burutuko da, 19:30etik 21.00etara bitartean. Ez da beharrezkoa izango aurretiaz izena ematea.
Jabekuntza eskolaren helburua emakumeek bizi duten desberdintasun egoera azaleratu eta beraien parte hartze sozial eta politikoa sustatzea izanik, formaziorako, hausnarketarako eta elkargunerako espazioak sortzen dira. Ikasturtean zehar bederatzi ikastaro antolatu dituzte, tartean, Coaching feminista, umore tailerra, zoru pelbikoa lantzen, hilekoarekin bizi… Lehenengo ikastaroa, literatura tailerra izango da, eta emakume natiboamerikarren literatura izango du hizpide aurten. Ainhoa Aldazabalek bideratuko duen ikastaroak bi orduko 12 saio izango ditu, eta urriaren 14an izango da lehenengoa, 17:00etatik 19:00etara.
Ikastaroez gain, Jabekuntza Eskolak izaera parte hartzailean duen heinean, jabekuntzarako gai batetik abiatuta talde parte hartzaileak eta iraunkorrak sortuz joan dira. Aurten lau izango dira parte hartze gune irekiak; literaturaz eztabaidatzeko gunea, Aringaingan, Andrabanda Feminista eta neska gazteen txokoa.
Aringaingan. Ikasturteko lehenengo ekimena Arantza Burgoa irakasle eta kirolzalean dinamizatzen duen Aringaingan taldearen aurkezpena izango da, egunean [urriak 6], 19:00etan, Etxelilan. Aurten gainera, erronka berri bati ekiteko asmoz: “Emakumeen triatloia edota herrikoia egitera animatzen?”. Bestalde,
Izena ematea. Ikastaroetan parte hartzeko beharrezkoa izango da aurretiaz izena ematea, eta bihar [urriak 4] hasiko da. Ikastaro bakoitzaren prezioa 5-10 euro bitartekoa izango da. Gainera, aurreratu dutenez, oinarrizko errenta jasotzen dutenek eta 20 urtetik beherako gazteek, %50eko deskontua izango dute. Izena emateko: matrikula-fitxa bete eta ordainketa egin behar da. Goizetan, Udal Diru-Bilketa bulegoan (Kantoipe 3an) egiteko aukera egongo da, eta arratsaldeetan, Etxelilan (Artibai 3, goiko pisuan). Matrikula ez da onartuko matrikula- fitxa bete eta ikastaroa ordaindu arte. Eta behin matrikula eginda, baja emanez gero, ez da dirurik itzuliko.
Antolatzaileek aipatu dutenez, ikastaroetan zaintza-zerbitzua eskainiko da, baina ezinbestekoa da zerbitzua beharko dela jakinaraztea matrikula-fitxan edo beranduenez ikastaroa bainoa astebete aurretik.
Bestalde, hiruhileko bakoitzean erakusketa bat ikusgai egongo da, lehenengoa, Bihotzetik irten zaidana izango da eta abendura bitartean egongo da ikusgai Etxelilako ordutegian, 16:30etik 20:30era. Sonia Garciak emakumeak protagonista dituen hainbat marrazki sortaz osatutako erakusketa osatu du. Egileak berak eta beragandik hurbil egon diren emakumeek bizitako egoera desberdinak batzen dituena, umore eta psikologia ukitu batekin.
Etxelilak, hamarkada bat. 2023a urte berezia izango da Etxelilarentzat, bere 10.urteurrena ospatuko baitu. Momentuz ez dute ezer aurreratu 2013ko sorreraren urtemuga ospatzeari buruz, baina azpimarra bat egin dute: “Martxoak 11. Gorde data”.
