Nerea Ibarzabal, nagusi Gotaine-Irabarnen
Bertsolari Txapelketa Nagusiaren lehen faseko lehenengo saioak jokatu dituzte markina-xemeindarrak eta Xabat Galletebeitia lekeitiarrak; Ibarzabalek zapatuan [urriak 1] jokatu zuen saioa, eta Galletebeitiak domekan [urriak 2].
Ibarzabal, zapatuko saioan kantatzen. Argazkia: Gari Garaialde Ibarzabalek 738 puntu lortu zituen Zuberoan jokatutako saioan, eta haren atzetik geratu zen Oihana Iguaran (737,5). Saioa irabazita, markina-xemeindarrak Irungo finalaurrekoan kantatuko du azaroaren 5ean, Sustrai Colina eta beste sailkatuekin batera. Galletebeitiak, ostera, 655,5 puntu lortu zituen domekan [urriak 2] Gasteizen jokatutako saioan; saioa Haritz Mujikak irabazi zuen, 695,5 puntugaz.
Horrela, beraz, Galletebeitiak zain egon beharko du puntuazioz finalaurrekoetara sailkatuko den edo ez jakiteko. Bertsozale Elkartekoek agertu dutenez, bi saioak jendetsuak izan dira; saio bakoitzean 650 ikus-entzule egon dira.
Lehen faseko azken bi saioak asteburuan jokatuko dira, Donostian eta Lizarran, 17:00etatik aurrera. Saioetako sarrerak www.bertsosarrerak.eus atarian daude salgai; egunean bertan 15:00etan zabalduko da txarteldegia.
Galletebeitia, Amaia Iturriotz urretxuarragaz batera, domekako saioan; atzean Haritz Mujika saioaren irabazlea. Argazkia: Alberto Elosegi
