Winter Series PRO-AMeko hurrengo jardunaldia, barikuan
Jai Alai Winter Series PRO-AM txapelketako finalerdiak jokatuko dituzte barikuan, Berriatuko Mendibarren pilotalekuan. Arbe-Lekue eta Gonzalez-Manzisidor bikoteak dira hautagaiak.
Argazkia: Andoni Iparragirre (Guk Jai Alai).. Harrobia eta eskarmentua uztartzen dituen Winter Series PRO-AM zesta-punta txapelketa abian da, eta ligaxkako hurrengo partiduak jokatuko dituzte barikuan. Gaur-gaurkoz, Jokin Arbe-Roberto Lekue eta Bixente Gonzalez-Mikel Manzisidor bikoteak txapelketako jaun eta jabe dira. Bi bikote horiek bai barikuan, bai domekan garaipen sendoak poltsikoratu zituzten, Berriatuko Mendibarren pilotalekuan maila handiko jokoa egin ondoren.
Barikuan, Arbe markina-xemeindarrak eta Lekue berriatuarrak hautagai nagusiak direla frogatu zuten, Eñaut Urreisti mutrikuarraren eta Ion Ibarluzea markina-xemeindarraren kontrako partiduan. Bikote beteranoak bere eskarmentua baliatu zuen, partidu gogorra eskuratzeko. Abiadura izan zen protagonista nagusia, eta hasiera oso parekatua izan zen. Minutuen poderioz, baina, Arberen eta Lekueren nagusitasuna nabarmenduz joan zen, eta bi setak irabazi zituzten: 15-13 eta 15-10.
Argazkia: Andoni Iparragirre (Guk Jai Alai).
Bigarren norgehiagokan, Bixente Gonzalez lapurtarra eta Mikel Manzisidor mutrikuarra hasieratik amaierara gailendu ziren Alex Goitia eta Gorka Mugartegi Atain markina-xemeindarren kontra. Azken horrek, hain zuzen ere, akats dezente egin zituen, eta horrek Goitia partidutik ateratzea ekarri zuen. Hortaz, Miarritzeko eta Mutrikuko puntistek ez zuten aukera galdu, eta garaipen sendoa lortu zuten lehen setean: 15-9. Bigarrenean, Markina-Xemeingo bikoteak egoera irauli zuen, 12-15 gailentzeko. Berdinketa haustera joan ziren bi bikoteak, beraz, eta hirugarren aldi horretan Gonzalezek eta Manzik ez zuten kale egin: 5-0eko markagailu zapaltzailea lortu zuten.
Maila handia. Domekako jardunaldian ere, goi maila izan zen nonnahi Mendibarrenen. Thomas Urrutiarra donibanegaraztarrak eta Aimar Aldazabal berriatuarrak ez zuten ezer egiterik eduki Arbe eta Lekueren kontra. Gogor saiatu arren, barikuko garaileek beren nagusitasuna berretsi zuten domekako saioan: 15-11 eta 15-08.
Bigarren partiduan ere, barikuko bide berberetik egin zuen jokoak. Bixente Gonzalezek eta Mikel Manzisidorrek, lehen partiduko irabazleek baino estuxeago izan arren, ez zuten inongo arazorik eduki Antxon Alberdi etxebarritarraren eta Eñaut Salegi markina-xemeindarraren kontrakoa irabazteko. Dena dela, partidu gogorra eta ondo jokatutakoa izan zen, Antxon eta Salegi hasieran aurreratu egin baitziren. Bixentek, behin pilotalekuan bere lekua topatuta, hamabina berdintzea lortu zuen, eta markagailua 15-13ra eroan zuen. Bigarren zatian, Antxonen mailak behera egin zuen, eta, hortaz, bikote gorria 15-11 nagusitu zen.
Argazkia: Andoni Iparragirre (Guk Jai Alai).
Jai Alai Winter Series PRO-AM txapelketako hurrengo jardunaldiko partiduak datorren barikuan jokatuko dituzte, horiek ere Mendibarren frontoian. Hirugarren jardunaldi horiek 20:00etan ipiniko dituzte abian, eta jokatuko duten lau bikoteentzat hil ala biziko partiduak izango dira: galtzaileak lehiaketatik kanporatuta geratuko dira, urriaren 17ko finalerako bidean.
