Urriko Azoka Nagusiak produktu onenen plaza bilakatu du Markina-Xemein
Lea-Artibaiko Urriko Azoka Nagusiak ehunka lagun batu ditu gaur [urriak 8] Markina-Xemeinen. Salmentak "nahiko onak" izan direla esan dute ekoizleek. Sari gehienak Markina-Xemeingo eta Etxebarriko ekoizle edota abeltzainek jaso dituzte.
Punta-puntako eskualdeko eta lurraldeko produktuz bete da gaur [urriak 8] Markina-Xemein. Beste behin ere, Lea-Artibaiko Urriko Azoka Nagusiak eskualde osoko eta inguruko herritarrak erakarri ditu. Nahikoa jende egon bada ere, azoka bi eremutan banatuta zegoenez, ez da jende pilaketa handirik sortu.
Ekoizleen esanetan, salmentak “nahikoa ondo” joan dira. “Jendea badabil erosten”, esan dute gehienek. Asko izan dira erosketak eginda batera eta bestera ibili direnak. Erosketak eginda, jan-edanera batu dira asko. Iratxe Ibarra bertsolari markina-xemeindarrak eta Alexander Idoeta ondarrutarrak bertsoz jantzi dute azoka eremua; erakusmahaietatik ibili dira, eta behin eta berriz produktuen kalitate ona azpimarratu dute botatako bertsoetan.
[ZUZENEAN ARGAZKI GALERIA IKUSI]
Umeentzako herri kirolak, abereen erakustaldia, musika eta bestelakoak izan dira protagonista. Dastaketa saio bi ere egin dituzte, eta ondoko produktuak dastatu dituzte: txakolina (Talaiazpi, Laneko eta Axpe), sagardoa (Axpe), gazta (Baskaran eta Txikiñe), ogia (labegur) eta irasagarra (Ondare). Erosketak egin eta jai giroan murgildu nahi zutenek, gainera, kontsignak eduki dituzte erabilgarri. Eta kontsignen erabiltzaileen artean zozketa ere egin dute: 8.036 zenbakia izan da sariduna (ordezkoa 8.004). Eguraldia lagun, giro ona izan da nagusi.
- ABEREEN SARIAK
- Limusina Onenaren saria: Etxebarriko Adorrixa baserriko Marcelino Egurrola. Sari emailea: Amaia Antxustegi Iraunkortasun eta Ingurune Naturala Zaintzeko foru diputatua.
- Pirenaika arrazako abere onena: Mallabiko Juan Luis Irazola. Sari emailea: Iosu Ogiza Lea-Artibaiko Landa Garapeneko lehendakaria.
- Betizu Onena: Etxebarriko Beinkun baserriko Julian Mandiola. Sari emailea: Luis Egurrola Markina-Xemeingo alkatea.
- Asturiana del valle arrazako abere onena: Markina-Xemeingo Araba baserriko Jesus Altzibar. Sari emailea: Jesus Iriondo Etxebarriko alkatea.
- Mestizo Onenen saria: Etxebarriko Eskutasulo baserriko Maria Itziar Yurrebaso. Sari emailea: Amaia Zabala Gizaburuagako alkatea.
- Ustiategi Onena: Markina-Xemeingo Illaspe baserriko Ismael Arriola. Sari emailea: Jon Arriola Berriatuko alkatea.
- Zalditegirik Onena: Juan Luis Irazola. Sari emailea: Nerea Urrutibeaskoa Lea-Artibaiko Landa Garapeneko zuzendaria.
- ERAKUSMAHAIETAKO SARIAK:
- Ortuarien Mahairik Onena: Igor Lete.
- Azokako Mahairik Onena: Baskaran.
- Txakolindegirik Onena: Jose Antonio Bilbao Axpe.
