Astelehenean hasita, 11 eguneko greba egingo dute Bizkaibuseko langileek
Greba egunak: Urriak 24, azaroak 2, 7, 9, 14, 16, 21, 25, 28 eta 30. Lanuzteak ondoko ordu tarteetan egingo dituzte, 05:50etik 09:20ra eta 18:00etatik 21:30era bitartean.
Bizkaibus zerbitzua ematen duen Busturialdea Lea Artibai Bus (BLB) enpresako langileek lanuzteak egingo dituzte astelehenean [urriak 24] hasi eta azaroaren 30era bitartean. Enpresagaz edukitako hitzarmenaren negoziazioek «aurrerapen txikia» dutelako eta soldata igoerarik gabeko proposamenak aurkeztu dizkietelako hartu dute erabakia. Langileek berretsi egin zuten Enpresa Batzordeak egindako 11 eguneko grebarako proposamena.
Greba egunak: Urriak 24, azaroak 2, 7, 9, 14, 16, 21, 25, 28 eta 30. Lanuzteak ondoko ordu tarteetan egingo dituzte, 05:50etik 09:20ra eta 18:00etatik 21:30era bitartean, eta 24 orduko greba egingo dute Gernika-Lumoko Urriko Azken Astelehenean.
Enpresa Batzordean –UGTk ordezkari bakarra dauka– aho batez bozkatu zuten greba proposamena, eta, sindikatuak esan duenez, lanuzteek Bermeo, Lekeitio, Ondarroa, Gernika-Lumo, Mungia, Ermua, EHU eta Galdakao-Usansoloko ospitalea Bilbogaz lotzen dituzten lineei eragingo die.
UGTk salatutakoaren arabera, «hitzarmenaren negoziazioak izoztuta» daude, izan ere, 2020ko abendutik, eguneratu gabe dago hitzarmena, eta enpresak adierazi du soldatak izozteko asmoa ere baduela. Testuinguru horretan, sindikatuak gogorarazi du Avanza Durangaldean «iazko KPIren (% 6,4) araberako soldata igoerak dituen hitzarmena lortu dutela».
Hori dela eta, KPIaren araberako soldata igoera jasotzen duen hitzarmen kolektibo berri bat eskatzen dute langileek. UGTk «fede onez negoziatzeko», eta, besteak beste, KPIa bermatuko duten soldata igoerak adosteko eskatu die «Bizkaibuseko zerbitzuaren arduradun» den Bizkaiko Foru Aldundiari eta Alsa / Transitia enpresa emakidadunei, «beste kontzesionari batean egin berri den modura». Hau da, emakidadun «batzuen eta besteen artean soldata aldeak ez ezartzeko» eskatu diete.
