Perretxikoen mundua hobeto ezagutzeko irteera egingo dute Lekeition
Lekeitioko Denboraren Bankuak antolatuta, irteera barikuan [urriak 21] egingo da. Lekuak mugatuta daude, eta interesatuek ondoko telefono zenbakira deitu behar dute: 648 51 17 41.
Lekeitioko Denboraren Bankuak hilabetean behin egiten ditu ekintzak. Eta antolatzen dituzten ekintza horiek bi helburu edukitzen dituztela azaldu dute: taldeko kideak elkar ezagutzea eta taldean ez dauden herritarrak taldera batzera animatzea. Eta beste behin ere, helburu horiei jarraituz egingo dute barikuko [urriak 21] irteera. Lekuak mugatuta daudela esan dute, eta momentuz hamabi herritar daudela izena emanda esan dute (gehienez ere hogei herritarrentzako lekua egongo da). Interesatuek ondoko telefono zenbakira deitu behar dute: 648 51 17 41.
Irteera 09:00etatik 12:00etara izango da; 09:00etan Magdalenako ermitatik abiatuko dira, eta parte hartzaileei mendiko oinetako eta arropa eramateko eskatu diete
Zer egingo da irteeran? Partaideek perretxikoen mundua hobeto ezagutzeko aukera edukiko dute: zeintzuk perretxiko batu ahal diren, ze neurritakoak eta abar. “Perretxikoak jasotzean berriro ere eremu horretan perretxikoak hazteko ingurua nola utzi behar den ere azalduko dugu. Eta perretxikoak batzeko oinarrizko arauak zeintzuk diren ere azalduko ditugu”. Hasiberriei zuzendutako irteera dela azpimarratu dute.
Antolatzaileen asmoa da hiru perretxiko mota hartzea: rubella (Lactarius subdulcis), ziza horia (Cantharellus cibarius) eta onddoak. Dena dela, azken egunetako hego haizea dela eta, dena sikatuta egongo dela eta agian ez dituztela perretxiko asko topako aurreratu dute. “Dena dela, azalpenak eman ahalko ditugu”. Irteera 09:00etatik 12:00etara izango da; 09:00etan Magdalenako ermitatik abiatuko dira, eta parte hartzaileei mendiko oinetako eta arropa eramateko eskatu diete. “Autorik ez dugu erabili nahi, eta Magdalenetik irtenda, Mendexa Abentura Parkerantz abiatuko gara. Parkean basoan ibiltzeko eremu aproposa dago, eta abentura parkeko arduradunak ateak zabalduko dizkigu. Horrez gain, parkearen inguruko azalpenak eta Leagi dorreari buruzko azalpenak ere emango dizkigu”. Beraz, irteeran ondarea ere landuko dute. Gainera, parte hartzaileei hamaiketakoa eramateko eskatu diete.
