Batzar Nagusia egingo dute zapatuan [azaroak 12], 18:00etan, Kofradia Zaharreko bigarren solairuan.
Ondarroako Aurrera Mendi Taldeak zuzendaritza taldea eraberritzeko deia egin du. Zapatuan [azaroak 12] egingo duten Batzar Nagusian landuko den puntu garrantzitsuenetako bat izango da, jarduerekin eta urteko balantzeagaz batera.
Gaur gaurkoz lau lagunek osatzen dute mendi taldearen zuzendaritza taldea: Juan Badiola lehendakaria, Fede Arantzamendi lehendakari ordea, Ibon Bedialauneta idazkaria eta Aitor Elordi diruzaina. Denbora luzez zuzendaritza taldean aritu ostean, azken urteetan bultzada galduz joan direla diote: “20 urte daramatzagu zuzendaritza taldean, ibilbide luzea dugu, eta azkenean bideak ahulduz joaten dira. Gure aldetik, heldu da unea norbait berria etorri eta taldeari behar duen bultzada emateko. Bestela, taldea stand by batean geratuko da, eta jarduerak eteten joango gara”.
Ahalegindu izan dira eraberritzea modu “natural” batean bideratzea, inguruko gazteei bultzada emanez, baina gaur gaurkoz ez da belaunaldi berrien hurbiltzerik eman. “Mendiari lotutako jende gazte asko ikusten dugu herrian bultzada duena; trailean dabilena, eskaladan… mendia beste modu batera ikusten dutenak. Aukera izan daiteke taldea beraien modura bideratzeko”. Ibilbide luzean lan egiteko modu bat bideratu izan dute, baina modu asko daudela azpimarratu dute: “Guk modu batera bideratu izan dugu, baina beste modu asko daude gauzak egiteko, bide asko zabaldu daitezke. Nahi adina modutara bideratu daitezke taldearen jarduerak”.
Konpromisoa. Taldearen ardura hartzeak konpromiso bat eskatzen du, baina ez da zama handia daraman lana: “Gauza konkretu batzuk bete behar dira; jendeari eman beharreko arreta eta noski federatu txartelak egiteko unean egin beharreko lana eta aseguruarekin dituen loturak”.
Bilerara hurbiltzeko deia egin dute, informazioa zabaldu eta beharrezko azalpen guztiak emango dituzte. Norbait interesatuta balego, beraien laguntza emateko prest agertu dira, urteetako esperientziak eman dizkien gakoak elkarbanatu eta urratsak emateko.
