Santa Zeziliko ekintzekin hasiko dira asteon
Besteak beste, Ondarroan, Mutrikun, Markina-Xemeinen eta Lekeition egingo dira ekintzak.
Santa Zezilia eguna datorren astean bada ere, musikariekin eta musikagaz gozatzeko hitzorduak bihar bertan hasiko dira zenbait herritan. Beste behin ere, herrietako kaleak doinuz eta giro alaiz jantziko dira.
Mutrikun, esaterako, Mutrikuko Musika Bandak zapatuan [azaroak 19] eskainiko du kontzertua. Eta hitzordu horren berri emateaz batera, bandak hartu duen erabakia jakinarazi dute: «Mutrikuko Musika Bandak ia urtebete darama zuzendari ofizialik gabe. Egoerari buelta emate aldera, bandak zuzendari hautaketa prozesua martxan jarri du, eta deialdira aurkeztu direnen artean hiru hautagai aukeratu ditugu. Hautagaietako bakoitzak bi kontzertu zuzenduko ditu eta, ostean, bandak hiru hautagaietako bat aukeratuko du». Beraz, zuzendaria aukeratzeko prozesua madalenetara arte luzatuko dela aurreratu dute. Horrez gain, zapatuko kontzertuan bazkideen artean zozketa bat egingo dutela esan dute; irabazleak Euskalduna Jauregian kontzertu bat ikusi eta ostean bertan afaltzeko saria irabaziko du. Zapatuan [azaroak 19] ere egongo da bazkide egiteko aukera.
EGITARAUA
- Ondarroa
- Zapatua, azaroak 19:
- Eguerdian: Txistulari Taldea kalerik kale ibiliko da
- 20:00ak: Txistulari Taldearen, Kantaize abesbatzaren eta Unanue Kamara Koralaren kontzertua, Andra Mari elizan.
- Azaroak 21, astelehena:
- 17:30: Unanue udal musika eskolaren kalejira.
- 19:30: Unanue udal musika eskolaren orkestra kontzertua, Kalekutzeko eskaileretan.
- Azaroak 23, eguaztena:
- 17:30: Unanue udal musika eskolak Musikalean ikuskizuna eskainiko du, Plaza Gainen.
- Azaroak 25, barikua:
- 16:30: Unanue udal musika eskolak Santa Zezili eguneko kalejira egingo du, musika eskolatik irtenda.
- Azaroak 26, zapatua: Kresala Musika Banda kalerik kale ibiliko da, eguerdian hasita.
- Zapatua, azaroak 19:
- Lekeitio. Zapatua, azaroak 19: Lekitto Musika Bandaren kontzertua, 12:30ean, Nautika aurrean.
- Markina-Xemein. Azaroak 25, barikua: Tarine Udal Musika Eskolak Zertzelada Musikala eskainiko du, 17:30ean, Arretxinagan.
- Mutriku. Zapatua, azaroak 19: Mutrikuko Musika Bandaren kontzertua, 13:00etan, Zabiel plazan. Oharra: Euria egingo balu, kontzertua komentuan izango litzateke.