25 urte, Ondarroa agertoki bilakatu zenetik
25 urte igaro dira Josu Eizagirre ondarrutarrak Anabasa Eremua filma errodatu zuenetik. Erakusketa eta filmaren proiekzioa egingo dituzte omenaldi gisa.
Iturria: Klik klak OLEE produkziñoik ekoiztetxeak burututako Anabasa Eremua filmak 25. urteur betetzen ditu. Josu Eizagirre Olearen bigarren film laburrak holokausto nuklearraren ondorengo gertakizun eta bizimodu hipotetikoa kontatzen ditu, estetika berezia erabiliz. 26 minutuko film laburra 16 milimetroko formatuan errodatu zuen Eizagirrek; zinemako formatuan egiten zuen lehenengo lana izan zen.
Filmaren gidoia idazten hasi zen, eta lehenengoarekin alderatuta, oso ezberdina zen, akzio gehiago izanik. Proiektuak paperetik errealitaterako jauzia egin zuen, gogoa oinarri izanik: “Bi aldiz pentsatu gabe, egiteko grinak bultzatu eta buru belarri proiektuan sartu ginen”. Aurrekontua, hasiera batean, miloi bat eta erdikoa (pezetatan) bazen ere, azkenean, sei milioi eta erdi kostatu zela aitortu du.
Ondarroa agertoki. Herrian eta herritarrekin grabatzea erabaki kontzientea izan zen: “Herritarrekin eta lagunekin egin nahi nuen, ezagutzen nuen lekuan. Istorioa idazten joan ahala banekien non errodatuko nuen”. Lantalde teknikoa Eizagirreren telebistako lankideek osatu zuten, 30 lagun izan ziren zehazki, gainontzekoak, herritarrak izan ziren. “Gaztetxeko kalean grabatu genuenean 128 lagun batu ziren, izugarria izan zen”.
Filmaketa luze joan zela aitortu du. Asteburuetan grabatu behar izan zuten, zehazki, zazpi asteburu izan ziren. “Jendea kontziente izan zen zinearen grabaketak zein aspergarriak izan daitezkeen”. Zailtasun asko zituen produkzioa zen; eguraldia, gaua, eta lokalizazio aldaketak. Asko neurtu behar izan zuten zer eta nola grabatu: “Rec-ari eman bakoitzean atzera kontua hasten da, dirua gastatzen zoaz”.
Zailena filma bukatu eta ondorengo prozesua izan zen: “Gutxi gorabehera urte bete igarotzen da filmaren postprodukzioa bukatu orduko, hortaz, zain egon beharra dago une askotan, eta aldatz gora bat izan zen niretzat”.
25 urteurrena eskerrak emateko modu bat da. Gogorarazteko esperientzia izan zen herritar askorentzat, Eizagirrerentzat, inflexio puntu bat: “Mundu berri bat ikusteko aukera izan zen, elkar laguntzagaz noraino heldu daitekeen, eta lotura handiak sortu genituen proiektuan aritu ginenen artean. Sare bat sortzen joan ginen. Hortaz, eskerrak ematea besterik ez dut, jendeak oso ondo hartu zuen proiektua, 23 urteko gazte baten zorakeri batean nola sartu ziren buru belarri”.
EGITARAUA
- Azaroaren 18tik 27ra
- Erakusketa, Ondarroako Erakusketa Aretoan: astelehenetik ostiralera 18:30etik 21:00etara, zapatuan eta jai egunetan 12:00etatik 14:00etara eta 18:30etik 21:00etara.
- Zapatua [azaroak 19]
- 19:30. Filmaren proiekzioa, frontoian. Euria eginez gero, udaletxeko aterpean izango da, eta bi hitzordu ezarriko dituzte, jendeari aukera zabalago eskaintzeko asmoz: 18:30ean eta 19:30ean.
- 21:00. Gominols taldearen kontzertua, Jai Braianen.
