Martutenera lekualdatuko dute Asier Badiola preso ondarrutarra
Presoari berari gaur [azaroak 29] jakinarazi diote Martutenera lekualdatuko dutela. Ez diote zehaztu lekualdaketa noiz gauzatuko den.
Azaroaren 14an jakinarazi zuten Asier Badiola preso ondarrutarra El Duesotik (Cantabria, Espainia) Euskal Herrira lekualdatuko zutela. Gaur [azaroak 29], ostera, Martutenera lekualdatuko dutela zehaztu diote presoari berari. “Jakinda lekualdatu egingo zutela, Asierrek nahiago zuen Martutenera lekualdatzea”, azaldu dute senideek.
Nahiz eta Zaballako espetxea berriagoa izan, Martutenen aurrez aurreko bisitetarako aukera gehiago daudela esan dute. “Horregatik, Euskal Herrira lekualdatzekotan, Asierrek berak nahiago zuen Donostiako espetxera lekualdatzea”. Dena dela, ez diote zehaztu lekualdaketa noiz egingo den.
Badiolaren lekualdaketak. 2013-14an Estremeratik (Madril) Picassentera (Valentzia, Herrialde Katalanak) lekualdatu zuten, eta 2021eko martxoaren 12an Picassentetik (Ondarroatik 655 kilometrora) El Duesora (Cantabria, Espainia), etxetik 120 kilometrora. Badiola 2021eko apirilaren 12an heldu zen El Duesora.
