Bigarren Neguko Bolak hiru txirlo bola joko txapelketa antolatu du MX3T taldeak
Markina-Xemeingo hiru txirlo bola joko taldeak urteko batzar orokorra egin du.
Argazkia: Markina-Xemeingo hiru txirlo taldea Bigarren urtez jarraian Neguko Bolak hiru txirlo bola joko txapelketa antolatu du Markina-Xemeingo MX3T taldeak. Aurten, gainera, jaurtialdiak handitu dituzte, iaz herriko Lauzirika bolatokian egin zen jardunaldi bakarra. Bigarren txapelketan, berriz, hiru egingo dituzte. Hain zuzen ere, zapatuan [abenduak 17] 18:30ean Lauzirikako bolatokian emango diote hasiera txapelketari. Urtarrilaren 14an 17:00etan Mallabiako Goita bolatokian jokatuko dute bigarren jardunaldia. Final handia urtarrilaren 21ean 17:00etan lehiatuko dute Markina-Xemeingo Bariña bolatokian.
Hiru jaurtialdi bakoitzerako izen ematea 5 eurokoa izango da, eta sariak banatuko dituzte bakoitzaren ostean. Batutako diruaren araberakoa izango da sari bakoitza. Lehenengoaren %100aren %40, bigarrenarentzat %30, hirugarrenarentzat %20 eta laugarrenarentzat %10. Hala ere, ordaindu gabe botatzeko aukera egongo dela esan dute. Ordaintzen dutenek izango dute sari ekonomikoak jasotzeko eskubidea. Horrez gain, antolatzaileek jakinarazi dutenez, federatuez aparte, beste edozeinek parte hartu dezake. “Helburua da bola zaletasuna sustatzea”, adierazi dute.
Sari orokorrak ere banatuko dituzte, hau da, hiru bolatokietako txirloak kontuan hartuta. Irabazleak txapela, garaikurra eta 75 euroko opari bonua eramango ditu etxera. Bigarrenak garaikurra eta 50 euroko opari bonua, hirugarrenak garaikurra eta 40 euroko opari bonua, laugarrenak, bosgarrenak eta seigarrenak ere garaikurra irabaziko ditu eta 30 euroko, 20 euroko eta 10 euroko opari bonua, hurrenez hurren.
Balantze positiboa. Bigarren Neguko Bolak txapelketaren aurkezpena baliatu zuten Markina-Xemeingo hiru txirlo bola joko taldekoek urteko batzar orokorra egiteko. Klubeko 20 kide elkartu ziren Uhagon Kulturguneko batzar gelan. “Emaitzak eta antolatutako jaurtialdiak kontuan hartuta, urte positiboa izan dela argi geratu da”, azpimarratu dute.
Argazkia: Markina-Xemeingo hiru txirlo taldea
Hala ere, kideek adierazi dutenez, “hunkigarriena” herriko eta klubeko federatua den Antonio Ibarluzea Lauzirikari egindako omenaldia izan zen. Gero, denek batera kopautxoa hartu zuten.
