Zabalik dago Lekeitioko beteranoen trinketeko XVII. binakako eskupilota txapelketan izena emateko epea
Txapelketa urtarrilaren 8an hasiko da, eta martxora arte luzatzea aurreikusten dute.
Euskal Herriko beteranoen mailako trinketeko eskupilota txapelketa bakarra da Lekeitiokoa. Beste urte batez domeka goizak eskupilotaren hitzorduak izango dira. Herriko Akarregi pilota kirol elkarteak antolatu du aurten trinketeko beteranoen XVII. binakako txapelketa. Baldintza bakarra jarri dute antolatzaileek, parte hartzaileek 40 urte edo gehiago izatea. Pilota goxoagaz jokatuko dute.
Izena emateko epea zabalik dago eta abenduaren 23an amaituko da. 50 euro ordaindu behar dira bikoteko. Horretarako, bi bide zabaldu dituzte, batetik, 674 56 18 00 telefono zenbakira deituz, eta bestetik, akarregipilota@gmail.com posta elektronikora idatzita bete daiteke izen-ematea. Txapelketa urtarrilaren 8an hasiko da eta antolatzaileek aurreikusi dutenez, martxora arte luzatuko da.
Helburu argi bat aurreratu dute, iazko sei bikote parte hartzaileak berdintzea edo gainditzea. Iaz bizkaitarrek jokatu zuten batez ere, baina baita gipuzkoarrak eta nafarrak ere. Iaz Berriatuko Gandiaga anaiek jantzi zuten txapela. “Txapelketa honen bereizgarri nagusia 40 urtetik gorako pilotazaleen topagune bat izatean datza, pilotan aritzeko adin mugarik ez dagoela erakutsiz eta gure-gurea dugun kirol hau sustatuz”.
