'Iratxoen kantu sekretuak' ikuskizuna, Lekeition
Emanaldia eguaztenean [abenduak 21] izango da, 17:30ean, Ikusgarri zinema aretoan. Sarrerak 2 euro balio ditu, eta kultur etxean erosi daitezke.
Argazkia: Gookapi Iñigito Txapelpunk abeslariak gidari lanak egingo ditu, eta Irati eta Naia Petralanda dantzariek lagunduta ariko da. Aldiz, Pintxo iratxoaren 3Dko abatarra Ugaitz Alegria aktore ondarrutarrak gidatuko du zuzenean. Ikuskizuna 0-8 urte bitarteko umeei zuzenduta dago. “Familian gozatzeko emanaldi aproposa da”.
Ikuskizunak Gookapi baso magikoan murgiltzeko aukera emango die ikus-entzuleei. “Pintxo iratxoaren abatar elkarreragileak ikus-entzuleei bere unibertsoko sekretuak kontatuko dizkie, eta baita mundu magikoan murgiltzeko koreografiak erakutsi ere”. Esan dute Pintxo iratxoagaz batera ariko direla Mithy, Liz, hur, Xira, Maisu Jakintsua eta gainerako iratxoak. “Horiek guztiek dantzaz girotuko dute emanaldia pantailatik”. Ikuskizun berritzailea eta hunkigarria dela diote.
