Zabalik dago Lekeitioko emakume sortzaile eta ekintzaileen VI. azokan izena emateko epea
Lekeitioko Udalak, Lea Artibai Fundazioagaz elkarlanean, martxoaren 19an egingo du azoka.
Seigarren aldiz antolatu du Lekeitioko Udalak, Lea Artibai Fundazioagaz elkarlanean, emakume sortzaile eta ekintzaileen azoka. Martxoaren 19an egingo dute herriko plazan 11:30eatik 14:30era. Aldez aurretik, berriz, izena eman beharra dago. Izena emateko epea otsailaren 5ean amaituko da. Bi aukera daude, batetik, udaletxeko harrera bulegoan, eta bestetik, lekeitioberdintasuna@gmail.com posta elektronikoaren bidez. “Helburua da Lekeitio eta inguruko emakumeek egiten duten lana ikusarazi eta honi presentzia eta indarra ematea”, esan dute.
Antolatzaileek hamabi postu jarriko dituzte, eta horretarako izena emateko epea zabalik dago otsailaren 3ra arte. Interesa dutenek zenbait baldintza bete behar dituzte, adibidez, nola ez, emakumea izatea, 18 urtekoa edo 18 urtetik gorakoa izatea edota Jarduera Ekonomikoetan alta emanda egotea. Parte hartzaile bakoitzak eskaera bakarra aurkeztu dezake. Horrez gain, ezinbestekoa da norberaren sorkuntza eta ekintzailetzaren ondorio diren produktuak eskaintzea.
Jakinarazi dutenez, ez dute parte hartze eskabiderik onartuko deialdi honetan ezarritako epe ofizialetik kanpo. Bakarrik deialdi honetan ezarritako epe ofiziala amaitzean zehazturiko saltokien kopurua baino eskabide gutxiago jaso badituzte onartu ahal izango dituzte epea gainditu ostean aurkeztutako eskabideak.
Emakume sortzaile eta ekintzaileen VI. Azoka herriko plazan egingo dute, baina euria edo haizea egin ez gero, Kontzijopean jarriko dituzte postuak.
