Herri kirolekin gozatzeko ekintza dakarte Aulestiko Narea auzoko San Bizente jaiek
Zapatuan [urtarrilak 28] ospatuko dituzte San Bizente jaiak Narea auzoan. Beti-betiko ekintzez gain, arratsaldean ere haur eta gaztetxoei zuzendutako ekintza antolatu dute aurten.
Ume eta gaztetxoak, 2019ko jaietan egindako umeentzako jolasetan parte hartzen. Aulestiko Narea auzoko auzotarrek herritarrentzako gogotsu prestatzen dituzten jaiak dira San Bizente jaiak. Hala, aurten urtarrilaren 28an ospatzea erabaki dute. Auzotarrek esan dutenez, orokorrean beti-betiko ekintzak izango dira nagusi. Hori bai, orain arte ez modura, aurten arratsaldean ere haur eta gaztetxoei zuzendutako ekintza egingo dute.
Mezagaz hasiko da ospakizuna, eta ostean umeentzako jolasak egingo dituzte. “Nahiz eta urteroko hitzordua izan, saiatzen gara urte bakoitzean jolas ezberdinak sartzen”, azaldu dute auzotarrek. Ostean, beti bezala, zaldi dema egingo dute; Aulestiko Kobaren Txikitor zaldia eta Ibekohondoren Kaiku nor baino nor gehiago ariko dira.
Arratsaldean karta jokoen txanda izango da. “Orain arte Briska eta Mus txapelketak ordu berean egiten ziren. Aurten, baina, ordu ezberdinetan egitea erabaki dugu”. Beraz, 17:00etan Briska Txapelketa egingo da eta 18:00etan Mus Txapelketa. “Bi txapelketetan sariak berdinak izango dira”. Hala, lehenengoek 200 euro eta txapelak eskuratuko dituzte, bigarrenek 120 euro eta hirugarrenek 90 euro.
Orain arte ez modura, aurten, arratsaldean haur eta gaztetxoei zuzendutako ekintza antolatzea erabaki dute. “Herri kirolekin gozatzeko ekintza egingo dugu haiei zuzenduta. Dena dela, ekintza horretan familian ere parte hartu daiteke”. Ostean, eta eguneko jaiari amaiera emateko, txokolatea banatuko dute.
EGITARAUA:
- 12:00: Meza auzoko ermitan.
- Ostean: Umeentzako jolasak.
- 13:00: Zaldi dema: Aulestiko Kobaren Txikitor zaldia vs. Ibekhondoren Kaiku zaldia.
- 17:00: Briska Txapelketa (hirukoteka)
- 18:00: Mus Txapelketa.
- 17:30: Herri kirolekin gozatzeko haur eta gaztetxoentzako zein familia osoan aritzeko ekintza.
- Ondoren: Jaiari amaiera emateko txokolatea banatuko dute.
