Musika eskaintza oparoa asteburuan
Sei taldek kontzertuak eskainiko dituzte asteburuan, Ondarroan eta Mutrikun.
Asteburuan musikaz gozatzeko aukera egongo da Ondarroan eta Mutrikun, guztira sei talde oholtzaratuko dira. Barikuan [urtarrilak 27] hiru kontzertu ikusteko aukera egongo da Ondarroako Gaztetxean, zapatuan [urtarrilak 28], berriz, Portuko Ranpan bi talde egongo dira oholtzan. Mutrikun, barikuan ezarri dute hitzordua.
Barikuan Ondarroako Gaztetxean izango da lehenengo hitzordua, 22:00etan: Aihotz, Vibora eta Zikin. Sarrerak bost euroren truke eskuratu daitezke. Aihotz taldea Bea, Astola, Juane eta Elenak osatzen dute eta Bilbotik datoz. Punk beltz eta zuzena eskaintzen du laukoteak, eta El no movimiento (2020) eta Matar al superhombre (2021) diskoak kaleratu ditu.
Ondoren, beste laukote bat ikusteko aukera egongo da; Vibora taldea. 2018an Gasteizeko hardcore eta punk eszenako beste talde batzuetako kideak batu ziren, eta proiektu horri ekin zioten. 2022an kaleratu zuten azken lana eta lehenengo biekin alderatuta “musika estiloari dagokionez aldaketa dakar, guztiaren gainetik letren bidez adierazi nahi duguna ezarri dugu”. Azkenik, laukote lekeitiarra; Zikin. Hardcore eta punk taldea, Zementua armosaten (2022) bigarren diskoa kaleratu dute, sei abestiz osatutakoa.
Barikuan, Mutrikun ere musikaz gozatzeko aukera egongo da. Bizkaiblues taldearen doinuak entzuteko aukera egongo da 22:00etan, Zubiaranen. 2022an abiatu zen blues taldeak lehengo kontzertuak eskaini zituen, eta urteko lehenengo hitzordua Mutrikun ezarri du, eta abesti berriekin datoz.
Zapatuan [urtarrilak 28] Ondarroako Radixu Irratiaren 32. urteurrenaren baitan kontzertuak eskainiko dituzte Portuko Ranpan; Kristonak eta Doe. Duela hamar urte Eskean Kristo izenarekin kaleratu zuten euren lehen diskoa eta oraingoan bosgarrena aurkeztu berri dute Kristonak izenarekin. Bestalde, Doe laukote ondarrutarrak osatutako taldea ikusteko aukera egongo da. Sarrerak (8 euro) eskuragarri daude Zurrumurrun eta Noyan.
ONDARROA
- Barikua [urtarrilak 27]: Aihotz, Vibora eta Zikin taldeak, 22:00etan, Gaztetxean.
- Zapatua [urtarrilak 28]: Doe eta Kristonak taldeak, 22:00etan, Portuko Ranpan.
MUTRIKU
- Barikua [urtarrilak 27] Bizkaiblues, 22:00etan, Zubiaranen.
