"Ines Osinagak" irabazi du Akerbeltz gaztetxeko bertso saio berezia
Bi urteko etenaldia eta gero, Markina-Xemeingo Gazte Asanbladak urteroko hitzordua berreskuratu du aurten. Abeslariz mozorrotu ziren bertsolariak, eta Nerea Ibarzabalek (Ines Osinaga) irabazi zuen saioa.
Bertsolariak, mozorrotuta. Argazkia: Markina-Xemeingo Gazte Asanblada. Markina-Xemeingo Gazte Asanbladak urtero inauterien atarian Akerbeltz gaztetxean egiten duten bertso saioa berreskuratu du aurten; pandemia dela eta, azken bi urtetan ez da egin ekimena. Euskal Herria independentea dela eta, Eurovision lehiaketara abeslari bat bidaltzea izan zen gaia. Sarrera guztiak agortuta, gaztetxea bete-beteta egon zela esan dute.
Orain arte lehiaketa taldeka egin izan bada ere, aurten bakarka egitea erabaki dute. Hala, bertsolari bakoitza abeslari batez mozorrotu zen: Nerea Ibarzabal (Ines Osinaga), Aissa Intxausti (Niko Etxart), Josune ARamendi (Kai Nakai), Joseba Sololuze (Gari), Lander Ibarluzea (Pello Reparaz), Garazi Navarro (Izaro), Xabat Galletebeitia (Erramun Martikorena) eta Sara Asenjo (Fermin Muguruza).
Lehenengo ariketetan Eurovisión lehiaketara joateko bakoitzak zeukan onena eman zuen eta, ondoren, buruz burukora Gari (Joseba Sololuze) eta Ines Osinaga (Nerea Ibarzabal) pasatu ziren. Azkenean, Osinaga izan zen garaile.
