Radixu Irratiaren urteurreneko 48 orduak barikuan hasiko dira
Pablo Gonzalez kazetariaren inguruko saio berezi bat egingo dute.
32 urte darama Ondarroako Radixu Irrati libreak komunikazio bidearen jardunarekin. Kanpandorreko estudiotik entzuleen belarrietara helduz, informazio, musika eta solasaldiak tartean, ahozko transmisioari eusten. Urteurrenak behar bezala ospatu behar dira, eta hori da Radixuko kideek egiten dutena, urtez urte, eta aurten ez da gutxiago izango. 48 orduko egitaraua osatu dute, eta barikuan [otsailak 10] abiatuko da, zehazki, 20:00etan, Leartigol irratsaioagaz.
Urteroko esentziari eutsiz, “oraingo eta lehengo irratsaioekin osatu dugu egitaraua”, hortaz, jada emititzen ez diren irratsaioak eta egun daudenak uztartuz, 48 orduko zuzeneko emisioa ekarriko du urteurrenak. Urtero legez, hitzordu berezia izango da bai esatarientzat eta baita entzuleentzat ere. Hamazazpi irratsaio eskainiko dituzte 48 orduko egitarauan, eta baita irratsaio berezi bat ere zapatuan egingo dena, zehazki, 12:00etan. Antolatzaileek aurreratu dutenez, “saio berezi bat izango da, Polonian atxilotuta dagoen Pablo Gonzalez kazetariaren inguruko irratsaioa izango da”. Elkarrizketatuak izango dituzte saioan, eta aurreratu dutenez, Oihana Goiriena Pablo Gonzalez kazetariaren bikotea izango da saion parte hartuko duen gonbidatuetako bat.
Sasoi bateko irratsaioak eta parrilan jarraitzen dutenenak, 105.5 FM dialean egongo dira entzungai, eta askotariko gaiez eta musika erritmoez gozatu ahalko dute entzuleek: solasaldiak, magazineak, elkarrizketak, saio musikalak, kirol saioak…
Zuzenekoak. Egitaraua zuzeneko kontzertuekin osatu ohi dute, eta aurten ere horrela izan da. Doe talde ondarrutarrak eta Kristonak taldearen kontzertuak izan ziren Radixu Irratiaren urteurreneko kontzertuak. Hain zuzen ere, urtarrilaren azken asteburuan ezarri zuten hitzordua Portuko Ranpan. Sarrerak agortuta, entzuleek ez zuten hutsik egin, punta-puntako giroa ezarri zuten oholtzara igo zirenak, eta entzuleen erantzuna ere maila berdinean egon zen.
EGITARAUA
- Otsailak 10, barikua
- 20:00. Leartigol
- 22:00. Ahuntzan gauerdiko eztule
- 23:00. Toleta apurtu
- Otsailak 11, zapatua
- 01:00. Naranja azule
- 05:00. Terranobako salau+ Ost
- 09:00. Uxola
- 12:00. Irratsaio berezixe
- 14:00. Boga ta zixe
- 17:00. Time to roots
- 20:00. Hilbehera
- 22:00. Bon vivant
- Otsailak 12, domeka
- 00:00. Kritikal blues
- 04:00. Kukulumutxun
- 06:00. Azken mohikanoak
- 10:00. 9 milimetro
- 12:00. Jon porruren ortua
- 15:00. Binilo artin galdute
- 18:00. Erozemat
- 20:00. Amatxueri
