Mendi Zikloa dakar Burumendi Mendizale Elkarteak
Herritarrengana heltzeko asmoz argazki erakusketa, dokumental emanaldia eta hitzaldia eskainiko dituzte.
Burumendi Mendizale Elkarteko kideak. Mendizaletasuna herritarrengana hurbildu eta jendea erakartzeko asmoz Mendi Zikloa antolatu du Mutrikuko Burumendi Mendizale Elkarteak. Pasaden urtean heldu zioten berriz ekimenari, “ohitura on bat zelako heldu genion berriz mendi zikloa antolatzeari”. Mendiaren alderdi ezberdinak ezagutarazteko asmoz, hitzaldia, dokumental emanaldia eta argazki erakusketa antolatu dituzte, denak ala denak, Zabiel kultur etxean izango dira.
Bihar [otsailak 24], 19:00etan abiatuko dituzte ekimenak, hain zuzen ere, Burumendi Espeleologia Taldearen argazki erakusketaren irekierarekin. Mutrikun dauden “altxorrak” argazki bidez erakusteko asmoa du erakusketak: “Lur azpian duguna argazki bidez erakutsi nahi dugu, espeleologia taldeak egiten dituen lan ezberdinak egongo dira, baina batez ere, Mutrikuko leizeak erakutsiko ditugu”. Ikusgarritasuna ardatz izango duen erakusketari irekiera emango diote, eta ondoren montxorra eskainiko dute.
Otsailaren 27an, berriz, Roca dokumentalaren emanaldia eskainiko dute; Miguel Angel Roldanek ELAren eraginpean Picu Urriellura egindako igoeraren jarraipena. Espainiako mendirik esanguratsuenetako bat igo, eta handik, gaixotasunaren aurkako borrokaren aldarria egin zuen.
Azkenik, Ruiz de Arkaute: XX. mendeko Europako espeleologiaren euskal erreferentea hitzaldia eskainiko du Oier Gorosabel Larrañaga espeleologoak. “Harremana dugu Gorosabelekin, Burumendi espeleologia taldearekin etorri izan da, elkarlana egin izan dugu”. Ruiz de Arkauteren ibilbidea erabiliko du espeleologia zer den azaltzeko, eta herritar guztiei zuzendutako hitzaldia izango da.
Egitaraua
Bihar, otsailak 24
- 19:00. Burumendi Espeleologia Taldearen Argazki Erakusketari irekiera
Otsailak 25- Martxoak 3
- Burumendi Espeleologia taldearen argazki erakusketa. Astegunean: 18:00-20:00. Asteburuan: 12:00-14:00
Otsailak 27
- 19:00. Emanaldia: Roca. Miguel Angel Roldan eta Fernando Roldan.
Otsailak 28
- Hitzaldia: Ruiz de Arkaute: XX. mendeko Europako espeleologiaren euskal erreferentea. Oier Gorosabel Larrañaga.
