Ondarroako Zaldupe zelaian aldagela berriak egingo dituzte
2023/2024 denboraldian egitea aurreikusten da. Lanak egin bitartean entrenamenduek eta partidek normaltasunez jarraituko dute.
Zaldupe udal futbol zelaian aldagela berriak egingo ditu Ondarroako Udalak 2023/2024 denboraldian. Gaur egungo beharrak aztertuta proiektua egiten ari da Aurrera. Behin proiektua bukatuta udalari emango dio dohaintzan, eta lanak lehiaketara aterako dira.
Duela 50 urte egin zen zelaiko eraikin nagusia, eta inauguratu zenetik ez da aldaketarik egin azpiegituretan. Hortaz, udalak eta Aurrerak egungo beharrizanak asetzeko azpiegiturak egitea beharrezko ikusi dute: “Gaur egun gabezia handia dute futbol zelaiko aldageletan”. Aurrera Kirol Elkarteak 200 jokalari, 35 entrenatzaile eta 650 bazkide baino gehiago ditu. Gainera, astebururo partida asko jokatzen dira Zaldupen, eta aste barruan arratsaldero entrenamenduak egiten dira 16:45etik 21:00etara. “50 urtetan instalazioetan ez da inolako konponketarik egin, inaugurazio egunetik ez baita aldaketarik egin, zaharkituta daude eta ez dute irisgarritasun baldintzarik betetzen”.
“Diru hori hartuta herriari ekarpen bat egin behar genion”.
Aurrerako zuzendaritza taldeak 2018ko batzarrean erabaki zuen ohiz kanpo jasotako diru iturri batetik 40.000 euro zelai berria egiteko proiektura bideratzea, eta hain zuzen ere, horretarako lehenengo pausoa aldagelak egiteko proiektua zen: “Diru hori hartuta herriari ekarpen bat egin behar genion”. Hortaz, hartutako konpromisoa berretsita, udalaren 2012ko eta 2017ko proiektuei hobekuntzak eginez, proiektu berri bat egiten ari da Aurrera Sabai Arkitektoak Estudioko Agustin Errea arkitektoaren eskutik: “Aurreran uste genuen guk ere ekarpen bat egin behar genuela proiektua aurrera eramateko. Gure iritziz ez delako bidezkoa udalean zeuden bi proiektuak ezerezean geratu ostean, hirugarrena ere udalak ordaindu behar izatea. Are gutxiago gure bazkideek diru hori aldagela berrien proiektura bideratzea erabaki zutenean 2018ko asanbladan” .
Aurreraren proiektua. Aurrera egiten ari den proiektuaren xehetasun batzuk azaldu dituzte, hala nola, proiektuak kiroldegi paretik Ertzain-etxe parerainoko eraikin luze bat dakarrela, solairu bakarrera, eta besteak beste, ezaugarri hauek izango dituela: bederatzi aldagela taldeentzat, epaileentzako aldagela bi, taberna, biltegia, gimnasioa, bulegoa, batzar gela eta komun irisgarria. Ikusleentzako sarrera kiroldegi paretik izango da. Lanek bi milioi euro inguruko kostua edukiko dutela aurreikusten da.
Obrak abenduan abiatzea aurreikusten da.
Alderdi biek adierazi dutenez, proiektua Aurreraren eta Ondarroako Udalaren arteko elkarlanaren fruitua da. Gainera, herrian beste kirol jarduera garrantzitsu bat dagoenean ere azpiegitura erabilgarri egotea adostu dute, beti ere, udalaren, Aureraren eta elkarte antolatzailearen arteko adostasunarekin.
Gaur gaurkoz proiektua egiten ari da Aurrera, eta hilabete hauetan udalari proiektua entregatuko dio. Behin udalak proiektua esku artean izanik, Hirigintza Sailak aztertuko du oniritzia emateko. Hurrengo pausoa lanak lehiaketara ateratzea izango da, obrak nori eman erabakitzeko. Aurreratu dutenez prozesu honek sei eta zortzi hilabete arteko iraupena izan dezake, hortaz, obrak abenduan abiatzea aurreikusten da. “Obrak abiatuta ere Aurrerako entrenamenduak eta partiduak Aurreran egiten jarraituko dira”.
Bestalde, otsailean Zaldupeko koadro elektriko batek su hartu zuen, hortaz, argiteria LED sistemara pasako dute eta kontsumoa %70era jaitsiko da. Horrez gain, proiektu berriari esker Zaldupen erabiliko den energiaren %70a bertan ekoiztuko da, berriztagarrien bidez: plaka fotovoltaikoak teilatuan, aerotermia sistema ura berotzeko, berogailu sistema naturala eta berrerabilitako urarekin zelaia ureztatzeko sistema.
