858 lagun bildu ditu Ondarroako Boga! mendi martxak
Urtero legez erantzun ona eduki du Zubi Zahar Herri ikastolaren eta Aurrera Mendi Taldearen ekimenez egindako mendi martxak.
Eguraldi ezin hobeak lagunduta, 858 mendizalek egin zuten atzo [apirilak 16] Ondarroako Aurrera Mendi Taldeak eta Zubi Zahar herri ikastolak elkarlanean antolatutako Boga! mendi martxa.
Aurten ohiko formatura bueltatzeko aukera izan zuten, eta hiru ibilbide izan zituzten aukeran parte hartzaileek: 54 km-koa, 24 km-koa eta 11km-koa. 203k kirolarik parte hartu zuten Euskal Herriko Iraupen Luzeko Zirkuiturako puntuagarria izan zen martxan, 383 abiatu ziren motza egitera eta 272 lagunek osatu zuten ibilbide txikia.
Antolakuntzak jendetza mugitu zuen, ohi bezala, martxa behar bezala antolatu eta guztia prest egoteko, eta jendeak ez zuen hutsik egin. Giro ederrean osatu zuten martxa, eta helmuga Zubi Zahar Ikastola izanik, musika eta jan edana izan ziren eguna borobiltzeko osagarriak.
