Berriatuko FTk Lurraldeko Lehen Mailan jokatuko du
Ligako azken jardunaldian, Basurto Bri irabazi diote Ibarra futbol zelaian. Ligan bigarren amaituta, zuzenean igoko dira mailaz.
Berriatuko FTko jokalariak, maila igoera ospatzen. Argazkia: Berriatuko Futbol Taldea. Berriatuko Futbol Taldeko kideak ospatzeko daude. Zapatuan [maiatzak 27] Lurraldekako Bigarren Mailako azken liga jardunaldia jokatu zuten Ibarran, Basurto B taldearen kontra, eta 5-1eko markagailuagaz nagusitu ziren. Garaipenak, gainera, Lehen Mailara zuzenean jauzia egiteko balio izan zien, liga bigarren amaitu baitzuten.
Argazkia: Berriatuko FT.
63 puntugaz, laugarren postuan iritsi ziren berriatuarrak azken norgehiagokara. Lehen Mailara zuzenean igaro ahal izateko, irabazteaz gain, aurkarien pentsuan ere egon beharra zuten. San Migel zegoen lidergoan, 65 puntugaz; Ariz eta Ibaiondo 64 puntugaz berdinduta zeuden; Berriatukoren ostean, aldiz, Mungia B zegoen, 61gaz. Bost horien artean zegoen liga, hortaz.
Eguneko aurkaria, Basurto B, aldiz, jaitsiera ekiditeko ahaleginean iritsi zen Ibarrara. Lehen zatitik, etxeko taldea nagusi izan zen: 3-0 aurreratu ziren lehen zatian. Berriatuarrak gainontzeko partiduetako emaitzen pentsuan ere egon ziren. Berriatuko partiduko atsedenaldia orduko, San Migel eta Ibaiondo beren partiduetan irabazten zihoazen; egoera, hortaz, ez zuten alde. Hori horrela, jokalari desberdinei minutuak emateko, zenbait aldaketa egin zituzten. 5-1eko garaipen paregabeagaz borobildu zuten norgehiagoka.
Zelaigunean bertan jaso zuten maila igoeraren albistea jokalariek
Helburuak beteta. Berriatuko partidua amaitu ondoren, baina, ezustekoa iritsi zen: San Migelek eta Arizek berdindu egin zuten. Zelaigunean bertan jaso zuten maila igoeraren albistea jokalariek. Taldetik azaldu dutenez, momentu “oso urduriak” bizi izan zituzten, baina azkenean “ezin hobeto” atera zen guztia: “Denboraldiko helburu nagusia bete dugu; egindako lan guztiaren ordainsaria da hau”.
Argazkia: Berriatuko FT.
Hurrengo denboraldiari begira, mailari eustea eta gazteen formakuntza izango dira Berriatukoren jomugak: “Taldea Lehen Mailan aritutakoa da eta, beraz, kategoria ezagutzen du. Dena dela, jokalarietako asko gazteak izango dira, eta horiek ahal bezainbeste ikastea garrantzitsua izango da”. Bestalde, klubetik jarraitzaileei eskertu gura izan diete emandako “babes eta elkartasun uholdeagatik”: “Herri txiki batentzat, futbol taldea edukitzea eta, gainera, jarraitzaileek hainbeste babestea ohore handia da. Hurrengo urtean, zaleak harro sentiarazteko moduko helburuak betetzen saiatuko gara berriro”.
