Bigarren jardunaldi gazi gozoa Markina-Xemeingo Grand Slamen
Goitia eta Lopezek nagusitasunez irabazi diote Barandika eta Basqueri. Bigarren partiduan Arbe eta Lekerikak aurrea hartu eta irabaztea lortu zuten: Lekerikak min hartu zuen.
Iturria: Eraman Alex Goitia markina-xemeindarra eta Imanol Lopez zumaiarraren estreinaldia izan zen Markinako Grand Slameko bigarren jardunaldia, eta goi goitik hasi zuten txapelketa. Gaztetasuna, indarra eta esperientzia bateratu eta aurrea hartu zioten Barandika eta Basqueri.
Aurrea hartuz abiatu zuten partidua Goitiak eta Lopezek; 4-1. Baina tanto gutxiren baitan urdinen jokoaren seriotasunak partidua aldatu zuen, finko atera ziren eta oinarri sendoak ezarriz, partidua bereganatzen hasi ziren: 5-8. Lehenengo geldialdia etorri zen: Lopezek Goitiari hitz batzuk eskaini zizkion, markina-xemeindarra lasaitu zuen eta konfiantza transmititu zion. Goitia pilotari aparta da, indartsua, ikusleak zutitzeko gai den horietakoa, eta Lopezek indar hori ateratzea lortu zuen: 15-12 amaitu zen lehenengo seta. Goitiak zuzen eta ausart jokatu zuen. Bikotea ondo ulertu zen, eta lanak ondo eginda bigarren seta ere poltsikoratu egin zuten: 15-13.
Bigarren partiduan Goikoetxea eta Gorka Mugartegi Atainek, Arbe eta Lekerika hartu zituzten. Hain zuzen ere, Atainen debuta izan zen txapelketa profesionalean eta 19 urteko puntistak ondo eutsi zion presioari: Uni frontoia beteta eta Goikorekin bikotea osatuz.
Urdinak aurrea hartuz abiatu zuten partidua: 3-6. Goikoetxea motzetik aritu zen: abiadura, norabidea eta efektua, hiru ezaugarriak bikain uztartuz. Urdinak abantaila handituz joan ziren, 5-10, 7-12. Atain ondo aritu zen, baina bikote zumaiarra partiduan ezin sartuta ibili zen: 11-15. Bigarren setean Atain eta Goikoetxea hobeto aritu ziren. Lehenengo tantua Atainek sinatu zuen, eta hasiera hobetu zen: 4-0.
Goikoetxeak bere jokaldiak eskaini zituen, motzak; errebotea erasotzeko jokaldi bilakatuz. Partidan guztiz sartuta egonik, eguneko ezbeharraren unea heldu zen: Lekerikak min hartu zuen. Seta berdinduta bukatu zen, eta azken bost tantuak jokatzekoak zirela, Lekerikak eta Arbek erabaki bat hartu zuten: Lekerika min hartuta zegoela ikusita, errebesez jokatuta eutsiko zion azken bost tantoei eta Arbek errematera jokatu behar zuen. Esan eta egin: 4-5 amaitu zen seta eta Lekerika eta Arbek irabazi zuten.
