Eguraldia lagun izan barik ere, arrakastatsua izan da Xiri Eguna
Antolatzaileek balorazio positiboa egin dute. Eguraldia okertu zenean irtenbideak pentsatu behar izan zituzten.
Mutrikuko Xiri Eguna “arrakastatsua” eta aldi berean baldintzatua izan zen. Mutrikuko Rock Kolektiboak Xiri Andonegi Egurbide mutrikuar eskultore eta margolariak Atxukale izeneko txokoan egin zuen obra biziberritzeko asmoz antolatutako egunak harrera ona izan zuen herritarren artean.
Goizean eguraldia lagun izanik, ekintzak giro onean abiatu ziren; Artisau Azokan eta Arte Eskolaren eskutik mural margoketa. “Eguerdira arte eguraldia lagun izan genuen, eta nabaritu egin zen. Azokan jende dezente ibili zen eta giro polita izan genuen”. Ondoren, Braulio talde ondarrutarrak eguerdia girotzeko ardura izan duen; eta lortu ere egin zuten.
Iturria: Begipuntuan
Baina Mutrikuko Erraldoi eta Buruhandien kalejirako unea heldu zenean, eguraldia aldatu eta euria hasi zen: bertan behera geratu zen kalejira. “Erraldoiak hasi behar ziren momentuan euria hasi zen, eta kolokan jarri zen guztia. Inprobisatzeko beharra ikusi genuen, arratsaldeko kontzertuei irtenbidea emateko asmoz”. Erraldoiak, ateri une batean atera ziren eta kalejira txiki bat egin zuten, horrez gain, bertsoa eskaini eta urteurreneko zapiak oparitu zizkion konpartsak familiari. Muzak taldeak Atxukalen eman behar zuen kontzertua bertan behera geratu zen, baina Mutrikuko Dei taldearen kontzertua lekualdatzea lortu zen, Gaztetxean jo zuten.
Braulio taldearen kontzertua. Iturria: Begipuntuan
Hortaz, zortzietatik aurrera Gaztetxea girotzeko ardura izan zuen Dei taldeak, D Elepuntok eta DJ Asak. “Gauean jendea hurbildu zen Gaztetxera, giro ederra egon zen”. Orokorrean, balorazio “oso positiboa” egin duten antolatzaileek: “Eguna arrakastatsua izan zen, baina eguraldiak eguna baldintzatu zuen eta irtenbideak inprobisatu behar izan genituen”. Hala ere, datorren urtean ezarri dute begirada: “Datorren urtera begira ere jarraitzeko asmoa dugu, urteroko hitzordu bilakatzeko asmoz, eta ea hurrengo urtean eguraldia lagun izaten dugun”.
