Kolorez jantzi dute Aulesti San Joan Egunean
300 lagunetik gora batu dira herri bazkarian. 42 parte hartzaile izan ditu sobra sariketak; zazpi sari banatu dituzte.
Urteko gaurik motzenagaz gozatu ondoren, plazan elkartu dira aulestiarrak, jaiari jarraipena emateko. Atzo [ekainak 23] bota zuten txupina, eta San Joan bezperan ohikoa denez, parkean sua piztu eta haren inguruan egin zuten jaia, buruhandi, musika eta dantzez lagunduta.
Gaur, berriz, urteroko hitzordua izan dute goizean, herritarrek hutsik egiten ez duten horietakoa; 23. Sobra sariketa. Ohi modura, meza ostean entregatu dituzte sobrak parte hartzaileek, plazan prest zegoen mahaian; guztira, 42 sobra aurkeztu dira aurten lehiaketara, eta banan-banan aztertu dituzte guztiak Karmele Goitiandia eta Antxone Aranzeta epaimahaiko kideek. “Aurten zerbait gutxiago izan dira aurkeztutakoak, hala ere, asko dira, galdu ezinezko hitzordua da herritar askorentzat, lan handia egiten dute”.
Epaimahaikideek urteak daramatzate sariketako epaimahai jardunean, eta aurten ere, ez dute lan erraza izan; urtero modura, txorta ikusgarriak aurkeztu dituzte herritarrek txapelketara. Bedarrak, ortuariak, laboreak, frutak eta lorak izaten dituzte; baina badaude puntuazio altuagoa ematen dutenak ere; “Trumoi idiak eta lirioak adibidez puntuazio altuagoa izaten dute”. Apaintzeko modua eta lotzekoa ere kontuan izaten dituzte.
Sobra sariketako irabazleak.
Sei sari banatzen dituzte urtero, aurten baina, zazpi banatu dituzte: lehenengo hiru sari, bigarrengo hiru sari eta sari berezia banatu dituzte. Aurtengo irabazleak Eider Arriaga, Arrate Jaio eta Mertxe Gerenabarrena izan dira, eta bigarren saria Encarna Anituak, Nekane Willisek eta Milak eraman dute. Sari berezia, berriz, Jare Arratek eraman du. “Sari bereziaren kasuan, puntuazioa albo batera utzi eta txorta ikusgarriena izatea da baloratu dena”. Giroa puntuan egonda, herri bazkariagaz gozatu dute izena emandako 300 lagunetik gorak. Ondoren, zer egin ez da faltako: hemen egitaraua.
