Dena prest dago Samikollako jaiei hasiera emateko
Txalainak eta Belarri Fuckers taldeen kontzertuez gain, DJ Urgozoren saioa egongo da zapatuan. Aurten, edarien txosnaz gain, aparteko txosna bat jarriko dute ogitartekoak emateko.
Mutrikuko Samikolla auzoan jai giro usaia hartu daiteke jada; asteburuan auzoko jaiak ospatuko dituzte, eta gogotsu daude. Egitarau oparoa prestatu dute, eta jendeari hurbiltzeko deia luzatu diote: “Samikollako jaiak egun osoko jaia izatea nahi dugu, hortaz, horretarako prestatu gara. Jendea etortzeaz gain, jendea geratzeko”.
Aurten, edarien txosnaz gain, aparteko txosna bat egongo da ogitartekoak emateko. “Geroz eta jende gehiago etortzen da. Hasi ginenetik jaiek geroz eta indar handiagoa hartu dute, antolakuntzatik ere urtero zerbait gehitzen joan gara, eta aurten ere, jendea animatzea espero dugu. Prest gaude hurbildu nahi duena esku zabalik hartzeko”.
Erraldoi eta buruhandien konpartsaren kalejira abiatuko dute 12:00ak emanaz batera, Goiko Plazatik irten eta auzoraino kalejiran joango dira herri guztia girotuz. Kalejira Samikollara ailegatzearekin batera txosna zabalduko dute. Txikienek, gainera, puzgarrietan jolasteko aukera ere edukiko dute.
Ohi legez, txupin jaurtiketa eta brindisarekin emango die hasiera ofiziala jaiei. Eguerdian, ostera, auzotarrak biltzen dituen auzo bazkaria egingo dute: 70 lagunek izena eman dute, gaur gaurkoz. “Aurten ohikoa baino jende gehiago animatu dela dirudi. Gainera izena emateko modua aldatu dugu, orain arte izenak atarietan apuntatzen genituen, eta aurten, aurretiaz tiketak hartu behar izan ditugu, azken ordukoak ekiditeko asmoz”. Arratsaldean, berriz, Ibiri baserriko abereekin jolasean aritzeko tartea izango dute gazteenek.
Une horretatik aurrera, musika bilakatuko da protagonista nagusia. Joxe Mendizabalek girotuko du arratsaldea. Gauean, ostera, Txalainak taldea izango da lehenengoa oholtzaratzen, jai giroa ezartzeko helburuagaz. Ondoren, herritarrak izango baitira auzotarrak girotzeko ardura izango dutenak: Belarri Fuckers taldearen unea izango da. Ostean, festa giroari eutsiko diote eta auzotar bat izango da horren ardura izango duena, DJ Urgozo. “Auzotarra izanik polita iruditu zaigu, urtero egoten da txosnan musika jartzen. Aurten agertokitik bere saioa eskaintzea ederra izango dela uste dugu”.
Domekan, berriz, 11:00etan meza egongo da parrokian. Ondoren, auzotarren une hunkigarrienari helduko diote: omenaldia. Unean bertan ikusiko da zein edo zeintzuk izango diren aurtengo omenduak, sorpresari eutsiz. “Hasiera batean auzoko zaharrenari ematen genion, baina urteekin, aldatuz joan da”. Aurten, aurreratu dutenez, omenaldi oso berezia egingo dute. Jan edana ez da faltako eguna girotzeko, salda eta txorizoa eskainiko baitute txosnetan.
Egitaraua
Irailak 9, zapatua
- 12:00. Erraldoi eta Buruhandien kalejira, Goiko Plazatik hasita Samikollara.
- Ondoren. Txosnaren irekiera eta puzgarriak.
- 13:00. Txupinazoa eta brindisa.
- 14:30. Auzo bazkaria.
- 18:00. Ibiriko pottokak
- Ondoren. Erromeria, Joxe Mendizabalekin.
- 22:30. Kontzertuak: Txalainak eta Belarri Fuckers.
- Ondoren. DJ Urgozo.
Irailak 10, domeka
- 11:00. Meza Santua Jasokunde Andre Mariaren parrokian.
- Ondoren. Omenaldia, Samikollan.
- Ostean. Salda eta txorizoa.
