Emakumezkoen zesta-puntako Elite Txapelketa jokatuko da Mutrikun
Barikuan [irailak 29] abiatuko da txapelketaren liga fasea, 19:30etan, Miruaitzen. Final handia, berriz, urriaren 27an jokatuko da.
Euskal Herriko zortzi puntista onenek parte hartuko dute Mutrikun lehiatuko den zesta-puntako Elite Txapelketan, eta barikuan [irailak 29] abiatuko da. Bigarren txapelketa hartuko du Miruaitz pilotalekuak, hain zuzen ere, iaz Berriatuak hartu zuen emakumezkoen lehenengo Elite Txapelketa.
Euskadiko Euskal Pilota Federakuntzak, Mutrikuko Udalak eta Mutrikuko Danok Bat Pilota Elkarteak antolatutako txapelketan Lea-Artibai eta Mutrikuko sei puntistek parte hartuko dute: Mutrikuko Danok Bat taldeko Lizardi eta Ortiz de Mendibil, Markina-Xemeingo Mugartegi eta Lejardi, eta Berriatuako Aldazabal eta Arakistain. Eskualdeko puntistez gain, zumaiako Watkinsek eta Gaztelekuko Merinok osatuko dute zortzikotea.
Formatua. Irailaren 29an, urriaren 6an eta urriaren 13an liga fasea lehiatuko dute. “Aurrelari bakoitzak atzelari desberdinekin jokatuko ditu liga faseko hiru jardunaldiak, eta atzelariek berdin”. Antolaketa zozketa bidez zehaztu da eta barikuan [irailak 29] lehiatuko den lehenengo jardunaldiko partidak zehaztu dituzte, partida guztiak 19:30etan abiatuko dira.
- Irailak 29
- Merino/Aldazabal – Ortiz de Mendibil/Lizardi
- Mugartegi/Watkins – Arakistain/Lejardi
- Urriak 6
- Merino/Watkins – Mugartegi/Aldazabal
- Ortiz de Mendibil/Lejardi – Arakistain/Lizardi
- Urriak 13
- Merino/Lizardi – Arakistain/Watkins
- Ortiz de Mendibil/Aldazabal – Mugartegi/Lizardi
Puntuazio sistemari dagokionez, emaitzaren araberako puntuazioa esleituko zaio puntista bakoitzari. 30-10 edo gehiagoko abantailarekin partidua irabazi dutenei 100 puntu emango zaie, galtzaileei, berriz, 0 puntu. 30-20 edo gehiagoko abantailarekin irabazi dutenei 80 puntu emango zaie, galtzaileei, berriz, 20 puntu. 30- (21-29) arteko abantailarekin irabazi dutenei 60 puntu eta galtzaileei 40 puntu.
Liga fasean lortutako puntuazioaren arabera finalerdietako bikoteak osatuko dira eta urriaren 20an lehiatuko dira bi partidak. Urriaren 27an, berriz, final handia eta hirugarren eta laugarren postuak egongo dira lehian.
