Erkiaga, Durangoko finala irabaztetik urrats bakarrera
Aritz Erkiaga ispastertarrak, Gorka Sorozabalegaz batera, garaipena lortu du Jai Alai Leagueko finalaurrekoan, Johan Sorozabal eta David Minviellen kontra.
Argazkia: Eraman Jai Alai. Durangoko Ezkurdi pilotalekuak Jai Alai Leagueko finalaurrekoak hartu zituen atzo [urriak 9]. Hautagai argiak eduki arren, ezustekoa nabarmendu zen finalerdietan. Jendetza elkartu zen harmailetan, mailako zesta-punta partiduez gozatzeko. Batetik, profesional mailako azken denboraldia egiten ari den Iñaki Osa Goikoetxea zumaiarrak eta bere herrikide Imanol Lopezek ezin izan zieten aurre egin Ludovic Laduche eta Thibault Basque donibandarrei. Azken horiek set bietan nagusitu ziren: 13-15 eta 12-15.
Argazkia: Eraman Jai Alai.
Partidu hori orduko, baina, lehendabiziko finalaurrekoa lehiatu zuten, eta neurketa horretan ez zen sorpresarako tarterik egon. Aritz Erkiaga ispastertarrak eta Gorka Sorozabal donibandarrak mailako garaipena lortu zuten Johan Sorozabal eta David Minvielle donibandarren aurka. Erkiaga eta Gorka sendo aritu ziren lehenengo setean, 15-11ko markagailuagaz nagusituz. Bigarrenean, ostera, gogotik sufritzea tokatu zitzaien. Izan ere, aurkariek buelta eman zioten partiduari, eta seta 13-15ekoagaz poltsikoratu zuten. Finalaurrekoa, horrenbestez, berdinketa haustera joan zen. Hirugarren set hartan, Erkiagak eta Gorkak beren legea ezarri zuten: 5-3.
Aritz Erkiagak eta Gorka Sorozabalek, batetik, eta Ludovic Laduchek eta Thibault Basquek, bestetik, lehiatuko dute finala
Ligako final handia hurrengo astelehenean [urriak 16] jokatuko dute. Hiru donibandar (Sorozabal, Laduche eta Basque) eta Erkiaga ispastertarra ariko dira nor baino nor gehiago. Ustezko hautagaiak Erkiaga eta Sorozabal izango dira, baina, finalaurrekoetako batean gertatu legez, edozer pasatu daiteke.
