Belaunaldi arteko garaipen handia

Aritz Erkiagak eta Gorka Sorozabalek Jai Alai Leagueko finala irabazi diete Ludovic Laducheri eta Thibault Basqueri.

2023/10/17

Aritz Erkiaga ispastertarrak eta Gorka Sorozabal biarriztarrak Jai Alai Leagueko finala irabazi zuten atzo [urriak 16], Durangoko Ezkurdi pilotalekuan. Aurrelari eskarmentatuak eta atzelari gazteak goi mailako bikotea osatu zuten ligako azkenengo norgehiagokan. Jai Alai Legaueren estreinako ekitaldian, baina, garaitzeko aurkari zail bi eduki zituzten aurrez aurre: Ludovic Laduche donibandarra eta Thibault Basque bidartarra.

Argazkia: Eraman Jai Alai.

Hain zuzen ere, Laduchek eta Basquek partidua aldapa gora ipini zien bikote hautagaiari. Lehendabiziko setean, bana, launa, zortzina eta hamarna berdindu zuten. Partiduari eutsi asmoz, Laduchek eta Basquek gehien interesatzen zitzaien materiala hautatu zuten: pilota biziak, jokoari abiadura eta erritmo handia emate aldera. Aukeraketa horrek min egin zion Sorozabali, baina aurre egin ahal izan zion, segurtasuna eta fidagarritasuna erakutsiz. Lehenengo seta, zerbait izatekotan, lehiatua izan zen. Erkiagak tantoa errebotean horma bikoa eginez lortu zuen lehenik, eta zabalean moztuta jarraian. Harmailak bete zituzten ikusleen txalo zaparradagaz lortu zuen bikote gorriak 15-13koa.

Lehen setean lehiakor aritu arren, bigarrenean behera egin zuten Laduche eta Basqueren jokoak eta moralak

Bigarren setean, urdinek ez zuten eduki lehenengoan izandako kolperik nahiz erritmorik. Abagune hori aprobetxatu zuten Erkiagak eta Sorozabalek, eta markagailua 6-1eraino eroan zuten, tartean horma bikoak eta txapa gainean egoki moztutako tantoak eginez. Laduchek eta Basquek ez zuten etsi, baina, bigarren setaren hasiera-hasieratik, partidutik oso kanpo aritu ziren. Bikote gorriaren segurtasunak gora eta gora besterik ez zuen egin, eta azkenean 15-5eko markagailuagaz gailendu ziren bigarren setean. Pisu handiko garaipena poltsikoratu zuten Erkiagak eta Sorozabalek. Elkarregaz eskuratzen duten bigarren txapelketa izan zen Durangon lortutakoa, abuztuan Donibane Lohizuneko Nazioarteko txapela ere irabazi baitzuten.

Argazkia: Eraman Jai Alai.

Beteranoa, gazteaz. Partidua amaitu bezain pronto, Erkiagak Sorozabalek egindako final bikaina goraipatu zuen: “Sorozabalek aurkariak euren onetik atera ditu, lasaitasun handiz jokatuz eta pilota guztiak behar ziren tokian sartuz eta niri segurtasun handia emanez. Lehen seta moralez gainezka amaitu dugu, eta eurek, ondorioz, apur bat etsi dute”.

Aritz Erkiaga: “Aurkariek materia bizia hautatu dute, indar handiagoa dutelako; guk, ostera, lasaiago jokatzen bilatu dugu, pilota mantsoagoekin”

Materialari buruz galdetuta, ispastertarrak adierazi du beraiei pilotarik “naturalenak” komeni zitzaizkiela: “Aurkariak guk baino indar handiagoa zutenez, material biziagoagaz min egin digute; guk, ostera, lasaiago jokatzea bilatu dugu, pilota mantsoagoekin”. Erkiaga Gernika-Lumon jokatuko den Jai Alai Winter Seriesi begira dago orain: “Puntista denak oso gogotsu daude. Winter Series denboraldiko ekitaldirik garrantzitsuena da, eta guztiak dute irabazteko gogoa”.