Zabalik dago Mendexako udal egutegia osatzeko argazkiak aurkezteko epea
Leixarra Elkarteak eta Mendexako Udalagaz elkarlanean antolatzen duen udal egutegia osatzeko argazki lehiaketa abiatu dute. Deialdia argazkilari profesionalak ez direnei zuzenduta dago eta urriaren 31 da argazkiak aurkezteko azken eguna; lanak leixarraelkartea@gmail.com helbidera bidali behar dira.
Mendexako baserri mundua da aurtengo gaia. Lehiaketara aurkezten diren argazkiak aurretik argitaratu gabekoak izan behar dute eta gehienez ere hiru argazki bidali daitezke. “Argi ez badago, argazkia zein tokitan atera den adierazi beharko da”. Lanak aurkeztean argazkiek izenburua eduki behar dute eta JPG formatukoak (3.000×3.600 px) izan behar dira.
Lanen aukeraketa egiteko zehaztutako epaimahaia azaroan elkartuko da eta erabakia hartu ostean, Mendexako Udalaren webgunean argitaratuko dituzte irabazleak. Sari banaketa abenduaren 25ean egingo dute, Leixarra Elkarteak urtero antolatzen duen argazki zaharren erakusketan. Lehenengo saria 100 eurokoa izango da, bigarrena 80 eurokoa eta hirugarrena, berriz, 50 eurokoa.
Epaimahaiak aurkeztutako lanak lehiaketatik kanpo utziko ditu zalantzazko egiletza daukatela uste izanez gero, bai eta pertsonen duintasunaren kontra egiten badute edota beste lan batzuen plagiotzat hartuz gero ere. Horrez gain, argazkiak Mendexako Udalaren kultur ondare izango dira: “Argazkiak erakusteko zein kopiak egiteko eskubidea edukiko dugu”.
