Etxebarriko Gazte Egunak bi belaunaldi elkartuko ditu
Zapatuan [urriak 21] II. Gazte Egunagaz batera, Gazte Asanbladaren 30. urteurrena ere ospatuko dute.
Iaz lehen aldiz antolatu eta gero indartsu datoz Etxebarriko gazteak. Zapatuan [urriak 21] egun osoko egitarauagaz ez dute bakarrik II. Gazte Eguna ospatuko, baita Gazte Asanbladaren 30. urteurrena ere. Hau da, bi belaunaldi elkartuko dira. “Helburua betikoa da, gazteen presentzia erakustea herrian eta gure artean ondo pasatzea, ez bakarrik herrikoen artean, baita inguruko herrietako gazteekin ere”, azaldu dute Gazte Asanbladatik.
Hain zuzen ere, gaur egungo gazteen eta duela 30 urte gazteak zirenen arteko lehia egin nahi izan dute. Horretarako, herri kirolen desafioa egingo dute. Lau talde osatuko dituzte, gazteen bi eta helduagoen beste bi, eta bikoteka lehiatuko dute zortzi probetan: korrika, txokor bilketa, txingak, zaku karrera, zaku eramatea, trontza, fardo jaurtiketa eta sokatira. Egin beharreko guztiak denbora gutxien egiten dituenak irabaziko du desafioa. Gero, jai giroan bete-betean sartuko dira trikipoteoagaz.
Dagoeneko Etxebarriko Gazte Eguna jai giroaz gain zerbaitegatik famatua egin bada, bere indiar janagatik da. 85 pertsona inguruk eman dute izena frontoiko herri bazkari handirako. Gazte Asanbladatik “oso pozik” daude izena eman duten gazte kopuruagaz. Gainera, aurten berritasunekin datoz, Markina-Xemeingo Axpe sagardotegiak kupela ekarriko du sagardoa txotxagaz atera ahal izateko. Hori gutxi ez, eta indiar janerako produktuak Etxebarria ingurukoak izango dira.
Bazkalosterako bertsolariak ariko dira kantuan. Arratsalde eta gauean, berriz, musika izango da protagonista. 18:00etan Gotx elektrotxarangak girotuko ditu herriko kaleak. Kontzertuak 21:00etan hasiko dira elizpean. Aiama, Uda eta Lumatzak MJ taldeak igoko dira oholtzara. Gazte Asanbladatik Gazte Eguneko kamiseta eramatea eskatu dute.
