Liburuen Amuak egitasmoaren lehenengo hitzordua urriaren 31n izango da
Nerea Ibarzabal markina-xemeindarraren Bar Gloria liburua landuko dute. Ikasturteko egitaraua zehaztuta daukate.
Ondarroako Udalak antolatzen duen Liburuen Amuak irakurle taldeak ikasturte berriko hitzorduak zehaztu ditu eta lehenengoa urriaren 31n [martitzena] izango da, Nerea Ibarzabal markina-xemeindarraren Bar Gloria liburuagaz, eta hain zuzen ere, idazlearen solasaldiagaz.
Ohiko formatuari eutsiko diote eta literatur zaleak hilabeteko azken zapatuetan elkartuko dira Txomin Agirre Udal liburutegian eta Joxemari Urteagaren gidaritzapean bi orduko saioari ekingo diote; 10:00etatik 12:00etara bitartean liburu bati buruz jarduteko aukera izanik. Aurten salbuespen bat egingo da, zehazki, lehenengo saioagaz, urriaren 31n [martitzena], 17:00etan egingo baita Ibarzabalen liburuari buruzko saioa, Kofradia Zaharrean.
Urrian hasi eta maiatzera bitartean, proposatutako lau liburu irakurri eta horiei buruzko hizketaldiari ekingo diote irakurle taldean. Ikasturteko bigarren hitzordua azaroaren 25ean izango da eta Hassan Blasinmen Kristo irakiarra landuko dute irakurzaleek. Ostean, urtero legez, etenaldia egingo dute eta otsailean ekiten diote berriro saioei, zehazki, otsailaren 24an bueltatuko dira. Bertan, Arantxa Urretabizkaiaren Azken etxea liburua izango dute hizpide. Apirilaren 27an, Gael Fayeren Ene herri txikia eleberriaren inguruan solastuko dira. Ikasturteko azken saioa, berriz, maiatzaren 25ean egingo dute eta idazleak parte hartuko du solasaldian, hain zuzen eren, Arrate Egaña idazlea hurbilduko baita irakurleekin batera bere Itzalen distira liburua lantzera.
Izena eman. Antolatzaileek gogorarazi dutenez irakurtzeko zaletasuna duen edonori zabalik dago egitasmoa. “Proposatutako liburuak irakurri nahi eta lagun artean komentatu?”. Parte hartu nahi dutenek aurretiaz izena eman behar dute eta bi bide daude horretarako: udal euskara zerbitzura deituta 94 683 36 68 edo mrey@ondarroa.eus posta elektronikora idatzita. Horrez gain, Txomin Agirre udal liburutegira deitu 94 683 33 43 edo liburutegia@ondarroa.eus posta elektronikora idazteko aukera ere badago.
IKASTURTEKO EGUTEGIA
Urriak 31
- 17:00. Nerea Ibarzabalen Bar Gloria liburuaren solasaldia, idazleagaz, Kofradia Zaharrean.
Azaroak 25
- 10:00. Hassan Blasinmen Kristo irakiarra aztergai, liburutegian.
Otsailak 24
- 10:00. Arantxa Urretabizkaiaren Azken etxea landuz, liburutegian.
Apirilak 27
- 10:00. Gael Fayeren Ene herri txikia eleberria, liburutegian.
Maiatzak 25
- 10:00. Arrate Egañaren Itzalen distira, autoregaz batera, liburutegian.
