Helburuak bete ditu Mutrikuko auzolaneko ekimenak

Putzuaren inguruan itxitura bat egitea izango da hurrengo urratsa. Urte hasierarako aurreikusten dute hurrengo hitzordua.

Naia Arantzamendi

Mutriku

2023/10/24

Mutrikuko natura ondarearen berreskuratzeko bidean, Artzainerrekan urmaela sortzeko auzolana egin zuten zapatuan [urriak 21]. Hamar lagun inguru hurbildu ziren lan saiora eta “goiza giro paregabean” igaro zuten. Zehaztutako eremuaren inguruko natur balioak babestu eta hobetzeko nahitik abiatutako ekimenak helburuak bete zituen.

[ARGAZKI GALERIA IKUSGAI]

Zapatuko lan saioaren helburua aurretiaz eginda zegoen urmaelaren zuloa gaitzea zen, baina gunera heltzean sorpresa batekin topo egin zuten. “Aurreko eguneko euriteak eraginda ur dezente zegoen. Hortaz, paradoxikoki lehenengo lana ura ateratzea izan zen”. Ondoren, tela batzuk jarri behar zituzten zuloaren behealdean, iragazgaitza izateko asmoz. Hortaz, ura atera ondoren, beharrezko telak jarri zituzten eta lurrarekin estali zuten. “Putzuaren oinarrian landareak haztea da helburua, hortaz, zapatuan egindako lanaren ostean, putzuak eboluzio naturala jarraituko du eta bere kabuz landareztatzen joango da”. Hurrengo pausoa putzuaren inguruan itxitura bat egitea izango da.

Hurrengo urratsak. Lehenengo urratsa udan eman zuten, hain zuzen ere, espezie inbaditzaileak kentzeari ekin zioten; Sasiakazia (Robinia pseudoacacia). Asteburuan prozesuarekin jarraituz, bigarren urratsari ekin zioten urmaelaren eratzearekin. “Abian dagoen prozesu bat da, ez dira ekintza puntualak, hortaz, aurrera begira ere hitzordu gehiago egongo dira”. Zehazki, urte hasierarako aurreikusten dute hurrengo hitzordua; auzolanean bertako espezieak landatzeko eta errekuperatzeko auzolana egitea aurreikusten da.