Familiarteko giroa Santa Katalina Egunerako
Ume, gazte eta heldu, guztiak batu dira Santa Katalina Eguneko ospakizunetan Gizaburuagan. 40 nagusi eta 12 gazte eta ume batu dira herri bazkarian. Pertsonen arteko harremanak errespetuan, autonomian eta berdintasunean oinarrituko dituen gizarte batean bizitzeko premia azaleratu dute Azaroak 25eko adierazpenean.
Santa Katalina Eguneko barraskilo lasterketako parte hartzaileak Eguraldia ez da oztopo izan Gizaburuagan gaur [azaroak 25] Santa Katalina Eguna goi-goitik ospatzeko. Mezaren ostean, udaletxean batu dira ume, gazte eta helduak, Indarkeria Matxistaren Kontrako Eguna izanik, aldarrikapena eta ospakizuna batzeko. Planto irakur zitekeen pankarta bat margotu dute, more kolorez eta kolore bereko herritarren eskuekin inguratuta.
Barraskilo lasterketa egin dute ostean, frontoian. Hamabost barraskilo aritu dira, zein arinago helmugara heldu eta, azkenean, Izadi Iparragirre Torrealdearen eta Arantza Espinosa Gonzalezen barraskiloak izan dira azkarrenak. Batera sartu dira helmugan. Eki Gaona Torrealdearena izan da ondorengo sailkatua.
Udaletxeko balkoian jarraitu dute ekimenek. Goizean egindako pankarta zintzilikatu dute udaletxeko balkoitik 13:30ean, eta herriko hiru neska gaztek elkar errespetatzeko eta tratu onak bultzatzeko deia zabaldu dute herritarren aurrean: “Gaur azaroaren 25a da, mundu guztiko neskatila, neska eta emakumeek oraindik ere jasaten duten sexismoaren, desberdintasunaren eta indarkeriaren aurka borroka egitearen garrantzia azpimarratzeko eguna. Gure nahia da pertsona guztiekiko tratu onak bermatuko dituen gizarte baten bizitzea. Pertsonen arteko harremanak errespetuan, autonomian eta berdintasunean oinarrituko dituen gizarte batean bizitzea, non pertsona guztiek askatasuna izango duten nahi duten bezalakoak izateko eta potentzialtasun osoz garatzeko”.
52 lagun, mahai inguruan. Herri bazkarian batu dira ondoren, herriko tabernan. 40 nagusi eta 12 ume eta gazte elkartu dira mahaiaren bueltan, egunari amaiera gozoa emateko. Giro ederrean joan dira ondorengo minutuak, eta ospakizuna borobiltzeko, bingo jokon aritu dira.
