Maderas de Lekeitioko lurra herriarena izango da berriro
Hilabeteetako negoziazioen ostean, "herrigunearen parekoa" den 200.000 metro karratu inguruko lurzorua berreskuratuko du Lekeitioko Udalak.
Hainbat hilabetetako negoziazioen ostean, Maderas de Lekeitioko lurra berreskuratuko du Lekeitioko Udalak. “Helburua beteta, pozik gaude udalean”.
Udaleko ordezkariek adierazi dute “ezinbesteko erabakia eta apustua” dela Maderas de Lekeitioko lurzorua berreskuratzea, “herriaren etorkizunari begira”. Izan ere, erosiko den lurzoruaren azalera 200.000 metro karratu ingurukoa da, “herrigunearen parekoa”.
Ez da bide samurra izan honainokoa eta negoziazioak ez direla errazak izan nabarmendu dute: “Ekainean Udal Gobernu berria martxan hasi eta lehen egunean bertan jakin genuen bertan behera gelditu zirela Maderas de Lekeitioko lurzorua erosteko negoziazioak. Momentu guztietan eduki dugu mehatxua lurrak kartera handidun norbati, atzerriko inbertsoreren bati, saltzekoa”.
La Caixagaz, lurraren ugazabagaz, negoziazioetan “ahalegin handia eginda”, Eusko Jaurlaritzako Ingurumen sailetik eskatzen zizkieten ingurumen betekizunak La Caixak bete ditzan lortu dute, eta baita herritarrentzako baldintza ekonomiko onenetan negoziatzea ere: “Eusko Jaurlaritzak maiatzean txosten bat egin zuen, ingurumenari lotutako zein lan egin behar ziren adieraziz. Lan horiek kostu ekonomiko bat dute, eta Udalaren helburua beti izan da lan horiek La Caixak egitea erosketaren aurretik”.
Udalak nabarmendu du alderdi politikoen kontu bat baino gehiago dela, eta horregatik, gaurko [abenduak 15] osoko bilkuran bozkatuko dute lurrak erosteko azken erabakia.
Etorkizuneko erronkak. Azaldu dute lurzoruaren etorkizuna erabakitzerakoan eremu hori arautzen duten legeek diotena kontuan eduki beharko dutela, “batez ere, Lekeitio eta Ispasterko planteamenduei lotutakoak, eta Kostako Legeari edo Ingurumenari lotutakoak. Eta, kontuan izan beharko dira, zelan ez, Lekeitioren beharrizanak eta nahiak”.
